Доларот најсилен во изминатите 20 години

Вредноста на американскиот долар во однос на референтните валути продолжува да расте, достигнувајќи го највисокото ниво во изминатите 20 години.
Индексот на доларот што ја покажува вредноста на американската валута во однос на шест најважни светски валути изнесува околу 103,56 поени, додека вчера изнесуваше 103,28 поени.
Валутата синоќа во еден момент достигна 103,93 поени, што е највисоко ниво од крајот на 2002 година.


Поддршка за доларот доаѓа од најавите за агресивно зголемување на каматните стапки на Одборот на федералните резерви и нестабилноста на финансиските пазари, што доведе многу инвеститори да бараат побезбедно засолниште за капиталот. Последица на тоа доларот споредбено со референтните валути зајакна за повеќе од пет проценти, што не е забележано од 2012 година.
Утрово курсот на доларот во однос на јапонската валута се зголеми од вчерашните 129,65 на 130,50 јени, ново највисоко ниво во изминатите 20 години.
Американската валута зајакна и во однос на европската, па цената на еврото се намали на 1,0515 долари, ново најниско ниво во изминатите пет години.
Цените на нафтата повторно се намалија по вчерашниот значаен раст. Барел нафта на лондонскиот пазар поевтини за 0,55 отсто на 107 долари, додека на американскиот пазар намалувањето изнесува 0,60 отсто на 104,65 долари.

Пронајдете не на следниве мрежи: ©ПУЛС24.МК Вестите на интернет страницата на редакцијата ПУЛС24.МК може да се користат исклучиво за лично информирање. Без писмена дозвола од ПУЛС24.МК или посебен договор, не е дозволено преземање, користење или реемитување на вестите.