СКОПЈЕ ЈА ДОБИ И ВТОРАТА ТАРТАН ПАТЕКА ВО ГРАДСКИОТ ПАРК

Loading...

По позитивното искуство од првата патека, граѓаните на Скопје од денес имаат можност да се рекреираат и на втората тартан патека што е оформена околу големото езеро во вториот дел од Градскиот парк, во еден од најживописните делови на паркот.

Оваа патека е наменета за сите граѓани, а не само за професионалните спортисти.

– Новата патека е со вкупна должина од 834 метри и е поставена кружно по должината на големото езеро во вториот дел од Градскиот парк. Во еден мал дел двете тартан патеки се преклопуваат, но тоа што е поважно е дека кругот кој го формираат двете патеки заедно изнесува точно 1000 метри. Граѓаните патеката ќе можат да ја користат и во текот на ноќта бидејќи се погриживме да ја осветлиме по целата должина со ново ЛЕД осветлување. Дополнително, околу патеката е поставена и соодветна урбана опрема и придружни содржини -инфо табли, чешми, клупи и корпи за џебен отпад – кажа на промоцијата на патеката градоначалникот Шилегов.

Шилегов додаде дека новата тартан патека заради сенките од околните дрвја кои ја штитат од сончевите зраци е поволна за користење и во летниот период кога паркот природно привлекува многу наши сограѓани кои криејќи се од летните температури доаѓаат тука да прошетаат, одморат и да се рекреираат.

За потсетување, пред две години Град Скопје ја изгради првата тартан патека, околу малото езеро, која е долга 534 метри.

Град Скопје и понатаму ќе продолжи да ги зголемува и уредува урбаните површини кои граѓаните ги користат за спорт и рекреација и на тој начин да ја унапредува животната средина создавајќи услови за развивање на здрави навики кај граѓаните.

Изминатиов период Град Скопје инвестираше многу за подобрување на условите за спортистите и рекреативците во паркот, каде покрај изградбата на двете тартан патеки, целосно е завршената и реконструкција на сите пешачки мостови, а во тек е и реконструкцијата на пешачките патеки.

* * * * Следете не на Фејсбук. * * * * Имаме интересни содржини секој ден, сите не се објавуваат на сајтот!!
loading...
Loading...