Социјалните мрежи се одговорни за депресијата кај тинејџерите?

Тинејџерките имаат двојно поголема веројатност за појава на депресија поврзана со користењето на социјалните мрежи, во споредба со тинејџерите, најмногу поради онлајн злоставувањата, пореметувањата во спиењето и незадоволството од сопствениот изглед, изјавиле истражувачите.
Во истражувањето кое ги анализирало податоците на речиси 11 илјади млади луѓе во Велика Британија, истражувачите заклучиле дека 14-годишните девојчиња се почести корисници на социјалните мрежи, од кои 2/5 ги користат социјалните мрежи повеќе од три часа во денот, додека тоа го прават само 1/5 од момчињата.


Студијата покажала дека 12 отсто од умерените корисници на социјалните мрежи и 38 отсто од оние кои социјалните мрежи ги користат повеќе од пет часа во денот, покажуваат знаци на сериозна депресија. Пореметувањата во сонот се појавуваат кај 40 отсто од девојчињата и 28 отсто од момчињата, а токму лошото спиење и анксиозноста се поврзани со појавата на депресија.
Ивон Кели, професорка на лондонскиот Институт за епидемиологија, која е еден од водечките истражувачи во студијата, ги повикала родителите и политичарите да обрнат поголемо внимание на овој проблем.
“Овие резултати се релевантни за развојот на насоките кога е во прашање сигурното користење на социјалните мрежи и ја повикуваат оваа индустрија поодлучно да ги регулира часовите на користење на социјалните мрежи кај младите луѓе”.Кели додала и дека семејствата сериозно треба да размислат за ограничување на користењето на мобилните телефони кај своите деца и да постават граници кога и каде е во ред да се поминува времето на социјалните мрежи.

Loading...