И покрај фактот дека септември е веќе на добар пат, Средоземното Море останува екстремно топло. Неодамна, беше завршена серија од 37 последователни дена во кои просечната температура на површината на морето се одржуваше над границата од 28 °C, што е повеќе од двојно поголемо од претходниот рекорд.
Според порталот MEDMOS на шпанскиот истражувачки центар CEAM, просечната површинска температура на Средоземното Море била 27,4 °C. Ова е дури за два степени повисоко од вообичаениот просек за ова време од годината и во исто време апсолутен рекорд за средината на септември.
Невидената низа траеше од 5 август до 10 септември, без ниту еден ден да падне под границата од 28 °C. Размерот на овогодинешниот екстремен топлотен бран најдобро се гледа со споредби со претходните рекорди:
– 37 дена (оваа година): Најдолг континуиран период со температура на морето над 28 °C.
– 15 дена (2024): Претходен рекорд за времетраење.
– 5 дена (2023): Трета најдолга епизода во историјата на мерењата.
За време на рекордната серија од оваа година, просечната температура на морето беше 28,29 °C, додека на својот врв достигна 28,65 °C. На првиот ден од оваа серија, на бовата Драгонера, во близина на брегот на Мајорка, беа измерени 33,02 °C, што е историски највисоката температура некогаш забележана во Средоземното Море.
Овој екстремен феномен е резултат на рекордно топлиот август, во кој честите топлотни бранови се придружија на долгорочниот тренд на затоплување, акумулирајќи огромна количина топлина во површинските слоеви на морето.
Долгорочните високи температури доведуваат до термички стрес кај морските организми, смрт на чувствителни видови и трајни нарушувања во морскиот екосистем. Покрај тоа, екстремно топлиот Медитеран претставува „темпирана бомба“ за есенските временски услови.
Повисоката температура на водата предизвикува зголемено испарување, поради што атмосферата апсорбира огромни количини на влага и енергија. Во случај на продирање на постуден воздух и формирање на циклони, топлото море може да стане гориво за екстремно силни бури и катастрофални поројни врнежи од дожд.
Пронајдете не на следниве мрежи:
