Американските разузнавачи сугерираат дека Пекинг размислува да и обезбеди на Москва беспилотни летала и муниција за употреба во војната во Украина, изјавија за Си-Ен-Ен три извори запознаени со разузнавањето.
Веројатно Пекинг се уште нема донесено конечна одлука за ова, но преговорите меѓу Русија и Кина за цената и обемот на испорака се во тек, според овие извори, според американската телевизија.
Според изворите, Русија од почетокот на војната постојано барала беспилотни летала и муниција од Пекинг, а кинеското раководство во последните неколку месеци активно дебатирало дали да испрати или не таков вид помош.
Американските власти во последните недели собраа информации кои сугерираат дека Кина се движи кон одлука да испорача воена опрема на Русија, според Си-Ен-Ен.
САД и нивните сојузници почнаа јавно да предупредуваат за потенцијалната кинеска воена поддршка за Русија минатата недела, во обид да го одвратат Пекинг од таков чекор, изјавија американски официјални лица.
Според изворите, обезбедувањето беспилотни летала и муниција, најверојатно за мало оружје, како што е пешадиското оружје, наместо артилерија, би било значаен напредок во поддршката на Кина за Русија, која до денес е во голема мера ограничена на компании кои обезбедуваат не- смртоносна воена помош, како што се шлемови, панцирни елеци или сателитски снимки.
Германскиот магазин „Шпигел“ во четвртокот прв објави, без да наведе извори, дека Русија е во преговори со кинески производител за купување на 100 дронови, кои би биле испорачани во април.
