Сирискиот претседател Ахмед ал-Шара ја поздрави одлуката на Соединетите Американски Држави да ја отстранат Сирија од списокот на држави спонзори на тероризмот, оценувајќи дека оваа одлука претставува значаен чекор кон ублажување на санкциите и економско закрепнување на земјата.

„Денес, Сирија се ослободува од темната дамка и го отстранува болното поглавје од своето минато со цел да се впушти во патот на развој, реконструкција и обнова“, рече Ел Шара во говорот, објави Ал Арабија.

Одлуката на Вашингтон ја поништи децениската ознака што подразбираше строги економски ограничувања, а Министерството за финансии на САД објави соодветно ублажување на санкциите.

Ел Шара ја изрази својата „голема благодарност“ до американскиот претседател Доналд Трамп и земјите кои, како што рече, ја поддржаа Сирија.

Сириските власти се стремат да привлечат инвестиции за обнова на земјата и инфраструктурата, тешко оштетени за време на повеќе од една деценија граѓанска војна.

Американскиот државен секретар Марко Рубио оцени дека одлуката го отвора „патот кон просперитет“ на Сирија и ги отстранува последните големи пречки за инвестиции во приватниот сектор, економско закрепнување и реинтеграција на Сирија во глобалната економија.

Сирискиот министер за надворешни работи Асад ал-Шајбани ја нарече одлуката „историска пресвртница“, велејќи дека таа ја одразува „посветеноста на новата сириска држава кон меѓународниот мир и безбедност“.

Министерот за финансии на Сирија, Мохамед Барние, го оцени потегот како „успех на сириската дипломатија“, нагласувајќи дека отвора можности за поголема интеграција на Сирија во глобалниот економски и финансиски систем, привлекување инвестиции и модерни технологии и поддршка на развојот.