Беспилотен авион направен од иверица и пена полета во литванскиот воздушен простор од Белорусија и се урна на еден километар од границата, но беше утврдено дека не претставува никаква опасност, објавија денес литванските власти.

Литванскиот премиер Гинтаутас Палукас и претседателот на парламентот Саулијус Скверналис беа накратко преместени во засолништа од бомби како одговор на влегувањето на објектот во литванскиот воздушен простор, според нивните портпароли.

Авиони на НАТО за контрола на воздушниот простор на Балтикот беа испратени во областа, но беа повлечени откако објектот падна на земја на еден километар од границата, изјави портпаролот на вооружените сили Гинтаутас Циунис на прес-конференција, според Ројтерс.

„Објектот сега не претставува никаква опасност, но сè уште не знаеме која била неговата намена“, рече тој.

Истрагите продолжуваат за да се утврди за што се користел и од каде потекнува, а литванското Министерство за одбрана соопшти дека изгледа дека некој го направил дронот дома.

Во септември минатата година, руски воен дрон што превезувал експлозиви, веројатно наменет за употреба во Украина, се урна во Латвија на околу 90 километри од границата со Белорусија.