Да беше жива денес, Клаудија Кардинале ќе го славеше својот роденден, а светот повторно ќе зборуваше за една од најубавите и најхаризматичните жени што некогаш застанале пред камерата. Нејзината смрт минатата година затвори големо поглавје во филмската историја, но сеќавањето на дивата што ги освои и Европа и Холивуд живее посилно од кога било.
Родена на 15 април 1938 година во Тунис, како Клоди Жозефин Роуз Кардинале, таа потекнува од семејство на сицилијански имигранти. Нејзините планови во младоста биле скромни, сакала да стане учителка. Но, судбината имала други планови.
На 18-годишна возраст, сосема случајно, таа беше крунисана за „најубавата Италијанка во Тунис“ иако никогаш не се пријавила на натпреварот, едноставно беше забележана во толпата. Главната награда беше патување на Венецискиот филмски фестивал. Таму позираше во зелено бикини и веднаш ги освои срцата на фотографите, продуцентите и режисерите. Италијанскиот писател Масолино Д’Амико ја опиша со зборовите: „Блескава во целата своја младост, таа изгледаше како да мисли дека малиот бран кликови на камерата е само игра”.
Сепак, зад таа насмевка се криеше тешка траума. На 17-годишна возраст, таа беше силувана од непознат маж, по што таа забремени. Клаудија Кардинале одлучи да го задржи детето.
Тајна бременост и први чекори во светот на филмот
Додека ја градеше својата кариера , ѝ беше советувано да ја крие бременоста од јавноста. Нејзиниот ментор и продуцент Франко Кристалди ја испрати во Лондон, каде што го роди својот син Патрик во 1958 година. Со години, јавноста го претставуваше како нејзин помлад брат, а момчето ја дозна вистинската вистина дури на осумгодишна возраст.
„Роа беа многу тешки месеци. Бев далеку од мојата татковина, се борев со туѓа култура и јазик што не го разбирав. Кристалди сфати дека сум бремена кога отидов да побарам раскинување на договорот. Мојот однос со него потоа стана поотворен, сè стана транспарентно”, се присети актерката.
Кристалди подоцна стана нејзин сопруг, го посвои Патрик и цврсто го контролираше нејзиниот живот и кариера со години.
Достигнување на светска слава
Клаудија го имаше своето деби во филмот „Гоха“ во 1958 година со Омар Шариф, а набрзо следеа голем број улоги. Таа глумеше во филмовите „Роко и неговите браќа“, „Гепард“ и во познатиот „8 и пол“ од Федерико Фелини, каде што за прв пат се слушна нејзиниот оригинален, рапав глас.
Дејвид Нивен ја нарече Клаудија „најдобриот италијански изум по шпагетите“. Не ја нарекуваа без причина „италијанката Брижит Бардо“. Набрзо таа се упати кон Холивуд, каде што глумеше во „Розов Пантер“ на Блејк Едвардс и „Си беше еднаш на Запад“ на Серџо Леоне.
Нејзината прекрасна убавина и актерски талент ја направија една од најбараните актерки на нејзината генерација, а до седумдесеттите години можеше да се пофали со над 100 снимени филмови.
Љубов и независност
Иако изгледаше дека живее хармонично со Кристалди, во 1975 година Клаудија се заљуби во режисерот Паскал Сквитиери и реши да го остави.
,,Сакав да бидам независна жена“, објасни таа подоцна.
Таа помина повеќе од 30 години со Сквитиери, имаше ќерка Клаудија, иако никогаш не се венчаа.
„ Го сакав поради неговата интелигенција, неговата убавина, неговата култура. Беше забавен и малку луд“, рекла таа по неговата смрт во 2017 година.
Живот без компромис
Кардинале отсекогаш била посебна и никогаш не се согласувала да биде фотографирана гола на филм, ниту да оди „под нож“ за естетски корекции. „Никогаш не сум била гола и никогаш не сум го променила лицето. Сакам да бидам тоа што сум, бидејќи никој не може да го запре времето”, рекла таа.
Таа беше прогласена за една од 50-те најубави жени на своето време, а сними и повеќе од 150 филмови. Таа беше и активен борец за правата на жените и заштитата на животната средина.
До самиот крај, таа остана симбол на слобода, сила и автентичност. Во 2017 година, таа беше лицето на Канскиот филмски фестивал, кога изјави: „Не ги разубавив моите години, ниту направив ништо против брчките. Им се извинувам на многумина за тоа.“
The post Беше малолетна кога беше силувана и остана бремена: Со години, нејзиниот син мислеше дека му е сестра, а во јавноста беше најубавата глумица на која сите ѝ се восхитуваа appeared first on Во Центар.
