За две и пол години, јавниот долг се зголемил за 2,5 милијарди евра, изјави пратеникот на СДСМ, Фатмир Битиќи, предупредувајќи дека со дополнителни 480 милиони евра долг, долгот ќе надмине 11 милијарди евра до крајот на годината.
Битиќи за „ТВ24“ ја нагласи потребата од објаснување на методот на евидентирање на 330-те милиони евра долг на Јавното претпријатие за државни патишта и дополнителните 150 милиони евра што ги најави министерката за финансии Гордана Димириеска-Кочоска.„Ова се дополнителни 480 милиони и ако се додадат 10,7 милијарди, веќе надминуваме 11 милијарди евра“, рече Битиќи.
Тој го оцени вториот ребаланс на буџетот како резултат на лошо планирање и несоодветно управување со јавните финансии, наведувајќи дека реализацијата на приходите е 73,4%, а расходите 76,6%, додека капиталните инвестиции се намалени за 5,8 милијарди денари.
„Факт е дека капиталните инвестиции се намалија за 5,8 милијарди. Но, другата информација, за која никој не зборува, а за која сериозно ќе бараме одговори на комисиската расправа, е како е можно на 19 октомври да имате реализација од 55,4%, во споредба со тековниот Буџет, кој е сè уште на сила“, нагласи Битиќи.
Според него, намалувањето на планираните средства не може да се претстави како подобрување во имплементацијата.
„Можете да скратите 20 милијарди и да кажете дека имате 100% реализација. Ако ова е целта, да се намалат капиталните инвестиции за да се зголеми процентот на реализација, тогаш скратете ги целосно и ќе има 100% реализација на инвестициите“, рече Битиќи.
The post Битиќи: Долгот ќе надмине 11 милијарди евра до крајот на годината appeared first on Во Центар.
