112 во Грција може да биде најважната порака што ќе ја добиете на телефонот додека сте на одмор. Ако на екранот се појави предупредување придружено со силен, карактеристичен аларм, не го исклучувајте автоматски и не претпоставувајте дека станува збор само за општо известување. Прочитајте ја целата порака и следете ја конкретната инструкција што ја испраќаат грчките власти, особено ако се бара евакуација од подрачјето во кое се наоѓате.
Предупредувањето е особено важно за македонските туристи кои викендов престојуваат во Грција. Грчкото Министерство за климатска криза и цивилна заштита за сабота, 15 август, прогласи многу висок ризик од пожари, категорија 4, во голем број области. Меѓу нив се Халкидики и Света Гора, едни од најпосетуваните дестинации од македонските граѓани. Халкидики и Света Гора се ставени и во режим „Red Code“, кој предвидува целосна мобилизација на механизмот за цивилна заштита.
Ризикот од категорија 4 е прогласен и за Атика, делови од Пелопонез и западна и централна Грција, Спорадите, Северниот и Јужниот Егеј, Крит и повеќе области во Источна Македонија и Тракија. Грчките власти предупредуваат дека многу силните и бурни ветрови ќе продолжат и на 15 август, а во делови од земјата се очекуваат удари од осум и девет бофори, што дополнително може да го отежне справувањето со евентуални пожари.
Што всушност е предупредувањето од 112?
Бројот 112 е единствениот европски број за итни случаи, но во Грција системот има и друга важна функција, преку него властите испраќаат предупредувања до луѓето кои се наоѓаат во подрачје зафатено или загрозено од опасност.
На паметните телефони предупредувањето најчесто пристигнува преку системот Cell Broadcast и се појавува директно на екранот, придружено со специфичен и гласен аларм. Целта е информацијата да биде забележана веднаш и да не се изгуби време кога се потребни мерки за самозаштита. Грчката цивилна заштита советува приемот на ваквите известувања да не се исклучува.
Важно е и да се направи разлика: секоја порака од 112 не е автоматски наредба за евакуација. Таа може да предупредува дека постои опасност и да бара зголемено внимание, но може и конкретно да нареди организирано напуштање на одредено место и да наведе во која насока треба да се движат граѓаните.
Ако пишува „евакуација“, не избирајте сопствена рута
Ако во пораката е наведено дека треба да се евакуирате, најважно е да ја следите насоката што ја дале властите. Не тргнувајте кон пат што вам ви изгледа пократок и не обидувајте се самостојно да се приближувате до подрачјето од кое доаѓа чадот за да проверите што се случува.
Официјалните упатства на грчката цивилна заштита се недвосмислени: кога е наредено организирано преместување на населението, треба строго да се следат инструкциите и маршрутите определени од надлежните служби. Во услови на пожар ситуацијата на патиштата може брзо да се менува, а маршрутата што властите ја одредуваат е дел од организираната операција за евакуација.
Колку е важна организираната евакуација покажа и пожарот во Касандра на Халкидики деновиве. Грчкиот министер за климатска криза и цивилна заштита соопшти дека во операцијата биле безбедно отстранети 446 лица, со учество на полицијата, крајбрежната служба, противпожарните сили и пловила.
Што да земете ако мора веднаш да заминете
При наредба за итна евакуација приоритетот не е багажот, туку безбедното напуштање на подрачјето. Ако неопходните предмети ви се при рака и нивното земање нема да го одложи заминувањето, понесете лични документи и пасоши, редовна терапија и неопходни лекови, мобилен телефон и полнач или преносна батерија, вода и најосновните работи за деца, повозрасни лица или лица со посебни потреби.
Препораките за подготвеност на цивилната заштита вклучуваат и основен комплет за прва помош, батериска ламба и резервни батерии. Европските насоки за подготвеност при евакуација посебно го нагласуваат значењето на лековите, водата, основните документи и неопходните лични предмети во комплетот за итни ситуации.
Но, ако пожарот е блиску или властите бараат итно заминување, не губете време во пакување и не враќајте се по куфери и други предмети откако веќе сте го напуштиле објектот.
Ако гледате пожар, јавете се веднаш
Во Грција, 112 функционира 24 часа дневно и повикот е бесплатен. Бројот може да се повика од мобилен телефон и без СИМ-картичка, а операторите комуницираат на грчки, англиски и француски јазик. При повик треба да кажете што се случило и каде точно се наоѓате. Современите мобилни телефони можат да испратат и податоци за локацијата до службата за итни случаи.
Грчката цивилна заштита посебно наведува дека доколку забележите шумски пожар треба веднаш да биде известена Противпожарната служба на бројот 199, со што е можно попрецизна информација за местото, правецот на пожарот и видот на вегетацијата што гори.
Каде да проверите дали пораката е вистинска
Доколку алармот помине брзо или случајно ја затворите пораката, на многу паметни телефони постои историја на итни предупредувања. Грчката цивилна заштита наведува дека сите емитувани предупредувања од 112 се објавуваат и преку официјалните профили на системот 112 на Facebook и X.
За туристите е важно информациите да ги проверуваат преку грчкото Министерство за климатска криза и цивилна заштита, системот 112, Противпожарната служба и локалните власти, а не само преку објави на социјалните мрежи или информации од други туристи.
За 15 август ваквата претпазливост е особено важна на Халкидики. Официјалната проценка е категорија 4, „многу висок ризик“, а грчките служби се ставени во зголемена готовност. Тоа не значи дека пожар мора да избувне, туку дека условите се такви што евентуален пожар може да бара брза реакција на службите и на луѓето кои се наоѓаат во загрозеното подрачје.
Извори: Министерство за климатска криза и цивилна заштита на Грција; Генерален секретаријат за цивилна заштита на Грција; Служба за итни комуникации 112; Европска мрежа за знаење за цивилна заштита
The post Важно! Како да се евакуирате од Грција ,112 дава инструкции! appeared first on Provereno.
Пронајдете не на следниве мрежи:
