Вишиот технолошки советник за војување со дронови при украинското Министерство за одбрана во понеделникот објави фотографии и видеоснимки од НЛО забележани од украинските воени сили, кои се слични на оние што Пентагон ги објави минатата недела.
Серхи „Флеш“ Бескрестнов, водечки украински експерт за дронови и електронско војување, потврди дека видувањето се случило во мај 2025 година и дека владата била запознаена со целиот случај, пишува Kyiv Post.
Детали за објектот
Едноминутната црно-бела инфрацрвена видеоснимка прикажува заоблен објект со видлив извор на топлина во средината и шест оштро зашилени конуси кои излегуваат од главното тело во форма на сплескана сфера. Зад објектот е видлива трага, односно облак потопол од ноќниот воздух. Снимката е направена од пилот на Силите за беспилотни системи за време на борбени операции. Објектот бил забележан минатата година на висина од 800 метри, при што снимката го прикажува како бавно лебди и не реагира на присуството на дронот.
Водечките украински медиуми ја потврдија автентичноста на снимките, но никој не сугерира дека се работи за вонземски објекти. Украина ги проучува НЛО-та првенствено поради можноста зад тој термин да се крие ново руско оружје, извести новинската агенција УНИАН.
Воена задача, а не цивилна љубопитност
Бескрестнов вели дека проучувањето на НЛО станало воена задача.
„Од почетокот на војната, проучувањето на НЛО во нашиот воздушен простор стана повеќе воена отколку цивилна задача. Вооружените сили на Украина дури имаат и посебен, детален документ за НЛО забележани од украинските единици, одобрен од врховниот командант“, напиша Бескрестнов на Телеграм.
Тој ги повика цивилите и војниците веднаш да пријават секое видување до властите, бидејќи може да се работи за таен систем на Кремљ за кој украинските сили сè уште не знаат. Објавата на Бескрестнов уследи откако Пентагон на 8 мај декласифицираше нови видеозаписи и фотографии од НЛО набљудувани од американските воени и владини агенции ширум светот.
Споредба со снимките на Пентагон
Украинското НЛО во некои аспекти наликува на објектот во форма на ѕвезда што американските сили го снимија на Блискиот Исток во 2013 година. На таа инфрацрвена снимка на Пентагон се гледа објект со четири големи и четири мали шилци. За разлика од украинското НЛО, неговото главно тело е совршено сферично и содржи ладни точки. Топлинската трага зад објектот снимен во Украина е погуста и побрановидна, додека на американската снимка е тенка и не се распрскува.
Русија од есента 2022 година систематски ја бомбардира Украина со крстосувачки, балистички и хиперсонични ракети, како и со беспилотни летала „Шахид“.
Видеото погледнете го на овој линк.
