По средбата која веќе ја оствари со премиерот Заев македонскиот претседател, Стево Пендаровски денес ќе се сретне со претседателот на Собранието, Талат Џафери. Како што се очекува на средбата би требало да се разговара за законите усвоени во Собранието, а кои се уште чекаат на потпис на претседателот или пак се само со потпис на претседателот на Собранието.
Новиот претседател Пендаровски веќе ги потпиша законите што беа донесени со двотретинско мнозинство и кои се дел од реформите во правосудството, а за кои шефот на државата нема право на вето. За оваа недела тој најави дека ќе потпише други закони што беа донесени во трето читање откако претходниот претседателот Ѓорге Иванов ги врати кај пратениците.
