Да, и бремените жени учеснички во сообраќајот, како возачи или совозачи, треба да носат појас. Иако можеби ви се чини дека е неизводливо, сепак ако правилно се намести појасот воопшто нема да ви пречи, а ќе бидете безбедни.
Оваа австралиска докторка на Тик Ток објави видео во кое покажа како правилно да се носи појасот во бременост. Како што се гледа во видеото, таа и самата е бремена во поодмината фаза односно 34 недели, а како што вели, забележала дека голем број жени не ја користат најбезбедната техника.
Доктор Кејти вели дека станала свесна за честата грешка при носење на појасот откако претходно примила бремена пациентка во болницата која доживеала сообраќајна несреќа.
„Вчера работев во одделот за итни случаи и се грижев за млада девојка во третиот семестар од бременоста и за жал таа беше вклучена во сообраќајна несреќа. Ја прашав како го носела појасот и таа ми кажа дека го носела врз стомакот. И ми текна дека можеби не знаат сите како да го носат појасот во бременост. Јас сум 34 недели бремена во моментов и појасот треба да го носите ПОД СТОМАКОТ.“, појасни докторката.
@dr.katie.hSafety first!! Share this with a pregnant person to raise awareness! #pregnancytips #caraccident #seatbeltcheck #cartiktok #pregnancyjourney #34weeks
Понатаму таа појаснува дека дијагоналниот дел на појасот треба да биде поставен над стомакот и помеѓу градите, а седиштето да биде колку е можно подалеку од воланот, за да се намали ударот од воздушните перничиња што би можеле да ве удрат вас и стомакот доколку се активираат, а долниот дел од појасот треба да биде поставен под стомакот.
Таа понатаму нагласува дека ако жената била во несреќа, без разлика колку и да била мала, веднаш мора да посети лекар затоа што како што вели „и најмалите несреќи може да доведат до компликации кај мајката и кај плодот“.
Погледнете го видеото во кое таа го објаснува ова:
Иако кај нас, некои луѓе сметаат дека бремените жени не треба да носат појас додека се учесници во сообраќајот, тоа не е точно.
Републичкиот совет за безбедност во сообраќајот на својата веб страна има објавено повеќе совети и препораки за бремените жени учеснички во сообраќајот.
Ако ги погледнеме препораките од РБСП ќе увидиме дека советите на докторката се издржани. Имено, меѓу другото, таму се вели:
„Обврската за користење сигурносен појас останува и покрај специфичната состојба во која се ноѓате. Она што е важно, е да внимавате појасот да биде правилно поставен. Тоа значи долниот дел од појасот да биде ставен под стомакот на колковите, но не и врз стомакот. Горниот дел од појасот треба да биде поставен над стомакот т.е. на клучната коска (помеѓу вратот и горниот дел од раката).“
Во однос на ограничувањата за тоа до која недела од бременоста е дозволено жената да управува со автомобил, од РБСП нагласуваат дека нема точно утврдени критериуми, но препораките се тоа да биде до 30-тата недела од бременоста.
„Не постојат директни ограничувња за тоа до која фаза од бременоста е дозволено да се управува со моторно возило, но сепак гинеколозите препорачувааат тоа да биде до 30 недела од бременоста, а ако возите на подолги дестинации да правите почести паузи.“
Кога управувате со моторно возило безбедноста секогаш треба да ви биде на прво место.
Советите и препораките како од австралиската докторка, така и од нашите институции се во насока на заштита како на мајката, така и на нероденото дете.
