Турскиот претседател Реџеп Таип Ердоган во телефонски разговор со американскиот претседател Доналд Трамп изјавил дека Анкара и натаму ќе придонесува во дипломатските напори за решавање на украинскиот конфликт. Притоа ја нагласил важноста од проширување на контактите и со Москва и со Киев.

Ердоган и Трамп во саботата разговарале за билатералните односи меѓу Турција и Соединетите Американски Држави, како и за актуелните регионални и глобални прашања, соопшти кабинетот на турскиот претседател.

„Претседателот Ердоган изјави дека турската страна и во иднина ќе придонесува во напорите за решавање на украинскиот конфликт и ја нагласи важноста од проширување на контактите и со Украина и со Русија“, се наведува во соопштението.

Турскиот претседател, исто така, изразил надеж дека интензивирањето на дипломатските напори за завршување на конфликтот меѓу Русија и Украина ќе донесе позитивни резултати.