Според проценките на американските Центри за контрола и превенција на болести (CDC), дури тројца од четворица возрасни земаат барем еден додаток во исхраната. Најпопуларни се витаминот Д, магнезиумот, витаминот Б12 и калциумот, кои се поврзани со зајакнување на имунитетот, подобар сон и повисоки нивоа на енергија. Додатоците во исхраната можат да бидат корисни, но повеќе не е секогаш подобро.
Претерувањето со витамини може да го оптовари телото и да предизвика низа симптоми кои лесно се игнорираат. Ова се најчестите знаци дека можеби земате премногу витамини.
Постојан замор, слабост и „магла во главата“
Иако недостатокот на витамини може да предизвика замор, истиот симптом може да се појави и со прекумерен внес. Препорачаната дневна доза на витамин Д е од 600 до 800 IU, додека горната граница се смета за околу 4000 IU.
Дигестивни нарушувања
Надуеноста, дијарејата и гасовите често се поврзуваат со прекумерен внес на магнезиум и витамин Ц. Телото не може да апсорбира големи количини, вишокот останува во дигестивниот систем и влече вода во цревата, предизвикувајќи дијареја. Витаминот Ц во големи дози може да предизвика и горушица, грчеви и гадење бидејќи ја иритира слузницата на желудникот.
Вртоглавица и главоболки
Прекумерните дози на витамин Е, Б6 или железо можат да влијаат на нервниот систем. Витаминот Е може да се меша во згрутчувањето на крвта, што може да предизвика главоболки. Железото може да се насобира во мозокот и да предизвика мигрена, додека витаминот Б6 во големи количини може да ги оштети нервите. Особено загрижува тоа што ова оштетување понекогаш не исчезнува дури и откако ќе се прекине лекот.
Срцеви палпитации
Прекумерниот внес на витамин Д, калциум или магнезиум може да ја наруши функцијата на срцето. Зголемените нивоа на калциум во крвта можат да влијаат на електричните импулси што го регулираат ритамот на срцето, што може да предизвика аритмии или чувство на забрзано чукање на срцето.
Промени на кожата
Еден од најзабележителните знаци на вишок витамини е промена на бојата на кожата. Прекумерниот внес на витамин А или бета каротен може да предизвика жолтеникаво-портокалова боја на кожата (каротенодерма), особено на дланките и стапалата. Оваа состојба е безопасна и исчезнува со намалување на внесот. Сепак, пожолтувањето на кожата проследено со пожолтување на белките на очите може да укажува на посериозен проблем со црниот дроб и да бара медицинска помош. Вишокот на витамин А може да предизвика и сува кожа, лупење и опаѓање на косата.
Проблеми со спиењето
Иако некои додатоци, како што е магнезиумот, го подобруваат сонот, други можат да го нарушат. Витамините од групата Б, особено Б12 и Б6, можат да го намалат нивото на мелатонин (хормонот на спиењето), да ја зголемат енергијата и будноста и да бидат причина за живописни соништа. А големите дози на витамин Ц можат да дејствуваат како стимуланс и да предизвикаат немир.
The post Здравствено предупредување: Неконтролирано земање додатоци во исхраната може да предизвика хаос во телото appeared first on Во Центар.
