Иранскиот министер за надворешни работи, Абас Арагчи, во петокот во Њу Делхи изјави дека недовербата е најголемата пречка за разговорите со САД за завршување на војната, додавајќи дека дипломатската помош на Кина би била добредојдена.
Арагчи рече дека контрадикторните пораки од Вашингтон дополнително ги комплицираат преговорите и покренуваат сомнежи за вистинските намери на американската страна.
„Поради нивните пораки, се сомневаме во сериозноста на Американците. Разговорите би можеле да се поместат од ќор-сокак ако САД се подготвени за фер и избалансиран договор“, рече тој.
Застојот доаѓа во време кога продолжува кревкото примирје, а тензиите продолжуваат да се закануваат со нова ескалација на Блискиот Исток и да ја продлабочат глобалната енергетска криза предизвикана од конфликтот.
Иран сè уште го контролира Ормутскиот теснец, важен морски премин низ кој минуваше една петтина од светската нафта пред војната, додека САД ги блокираат иранските пристаништа.
Американскиот претседател Доналд Трамп претходно оваа недела го отфрли најновиот официјален предлог на Иран како „ѓубре“. Иако, според АП, Техеран понудил одредени нуклеарни отстапки, Трамп бара високо збогатениот ураниум да се отстрани од земјата и да му се спречи на Иран да развива нуклеарно оружје. Техеран, од друга страна, тврди дека неговата нуклеарна програма е наменета исклучиво за мирновременски цели.
Арагчи изјави дека Иран би ја поздравил дипломатската поддршка од други земји, особено од Кина, потсетувајќи на претходната улога на Пекинг во обновувањето на односите меѓу Иран и Саудиска Арабија.
„Кинезите имаат добри намери. Затоа Исламската Република Иран би го поздравила сè што можат да направат за да помогнат во дипломатијата“, додаде тој.
Во меѓувреме, Пакистан соопшти дека ги продолжува дипломатските контакти за предлозите за прекин на огнот, но без да даде детали за разговорите.
The post Ирански министер за надворешни работи: Преговорите со Америка се попречени од недостаток на доверба, се сомневаме во нивната сериозност appeared first on Во Центар.
