Централната банка на Јапонија направи радикален потег и ја зголеми главната каматна стапка на ново највисоко ниво од 1995 година. Причината за оваа одлука лежи во наглиот пораст на глобалните цени на енергијата и промените на геополитичката сцена.
Банката на Јапонија ја зголеми референтната каматна стапка од 0,75% на 1%, што е највисоко ниво во последните 31 година.
Оваа одлука доаѓа во време кога и другите светски централни банки ги зголемуваат трошоците за позајмување поради зголемените трошоци за живот, кои се дополнително поттикнати од конфликтите и нестабилноста на Блискиот Исток.
Ова е огромен пресврт за третата најголема економија во светот.
Јапонските каматни стапки беа агресивно намалени во 1990-тите за да се ублажат катастрофалните ефекти од падот на цените на недвижностите и акциите. Речиси две цели децении, стапките беа блиску до нула, бидејќи цените постојано паѓаа, а економскиот раст стагнираше.
Сепак, ситуацијата драстично се промени. Во март 2024 година, Централната банка на Јапонија ја зголеми каматната стапка за прв пат по 17 години, а сега продолжува со постепено затегнување на монетарната политика.
„По 20 години дефлација, Јапонија сега е во инфлациски циклус на раст. Монетарната политика за управување со вонредни состојби и кризи повеќе не е потребна и Банката на Јапонија сака да се врати на нормалните текови“, изјави за Би-Би-Си истакнатиот јапонски економист Јеспер Кол.
Јапонија е под сериозен притисок да ја ограничи инфлацијата.
Актуелната премиерка Санае Такаичи, која ја презеде функцијата минатата година и се смета за застапник на големите владини трошоци, претходно се спротивставуваше на зголемувањето на каматните стапки. Сепак, под јавен притисок поради високите трошоци за живот, таа сега премолчено ја одобри одлуката, што го прави ова второ зголемување на каматните стапки од почетокот на нејзиниот мандат.
Одлуката на Јапонија е насочена и кон стабилизирање на јенот, кој со месеци е под огромен притисок и ја губи вредноста во однос на американскиот долар и еврото.
The post Каматната стапка во Јапонија се искачи на највисоко ниво од 1995 година appeared first on Во Центар.
