Обилните дождови што го зафатија регионот Андалузија предизвикаа смрт на три лица и хаос низ јужна Шпанија, соопштија регионалните власти. Најтешко погодена беше провинцијата Малага, каде што беа регистрирани најголем број инциденти, јавува „Еуроњуз“.
Првите две жртви, на возраст од 53 и 54 години, беа пронајдени во Алхаурин Ел Гранде, откако нивното комбе го однесе надојдената река. Третата жртва, 18-годишник пријавен за исчезнат, беше пронајден во Илора, провинција Гранада.
Во Малага се регистрирани 343 интервенции на итните служби, најчесто поради поплавени домови, гаражи и улици. Следува Гранада со 58 и Алмерија со 48 интервенции. Затворени се бројни патишта, а возила беа заробени во порои, додека одрони од камења беа забележани и во руралните и планинските подрачја.
Регионалната влада активираше План за вонредни состојби поради ризик од поплави, додека 36 општини ги спроведоа своите планови за цивилна заштита. Премиерот Педро Санчез повика граѓаните на претпазливост, советувајќи да се избегнуваат непотребни патувања и преминување преку поплавени подрачја.
