Незасладеното соино млеко е добар избор за луѓе кои сакаат да уживаат во млечни производи, а воедно да го следат нивото на шеќер во крвта. Кравјото млеко често содржи повеќе заситени масти и јаглехидрати, и нема докази дека е особено корисно за луѓе со висок шеќер во крвта. Иако некои истражувања сугерираат дека јогуртот може да го намали ризикот од развој на дијабетес тип 2, ова веројатно се должи на процесот на ферментација, а не на самото млеко, објавува Verywell Health.
Идеален нутритивен профил на соино млеко
Кремастото, незасладено соино млеко содржи приближно иста количина на протеини како кравјото млеко, но има помалку јаглехидрати и заситени масти, што го прави врвен избор за оние кои го следат шеќерот во крвта. Додека млечните производи обезбедуваат исхрана со калциум, протеини и витамини А, Б2, Б12 и Д, кравјото млеко содржи заситени масти.
Нивните високи нивоа во полномасното млеко можат да го зголемат ризикот од срцеви заболувања, кој е веќе поголем кај луѓе со висок шеќер во крвта или дијабетес. Доколку одлучите да пиете кравјо млеко, се препорачува да користите млеко со ниска масленост или обезмаслено млеко.
Ефект врз шеќерот
Кејси Ваврек, нутриционист во Медицинскиот центар Векснер на Државниот универзитет во Охајо, за „Веривел“ вели дека препорачува незасладено соино млеко бидејќи нуди добра рамнотежа на протеини и јаглехидрати без додадени шеќери.
„Обично содржи околу седум до осум грама протеини по чаша, што е споредливо со кравјото млеко, но со помалку јаглехидрати. Ова го прави добра опција за контрола на шеќерот во крвта, а воедно обезбедува и важни хранливи материи“, објасни Ваврек.
Таа додава дека е важно да се избере збогатена верзија за да се додаде калциум и витамин Д, што го прави соиното млеко уште послично од хранливата вредност на кравјото млеко.
Кога јаглехидратите се разградуваат, тие влегуваат во крвотокот и можат да го зголемат нивото на шеќер во крвта. Протеините и влакната го забавуваат варењето и помагаат да се спречат ненадејни скокови. Една чаша кравјо млеко со ниска масленост има приближно иста количина протеини како незасладеното соино млеко, но нема влакна и има речиси четири пати повеќе јаглехидрати.
Внимавајте на додадените шеќери
И млечните производи и млеката од растително потекло содржат природни шеќери – лактоза во кравјото млеко и сахароза, фруктоза или гликоза во пијалоците од растително потекло. Проблемот е што многу млека од растително потекло се дополнително засладени или ароматизирани, па затоа е клучно да се проверат етикетите и да се бараат информации за додадените шеќери.
Шерон Греј, нутриционист и едукатор на Универзитетот во Конектикат, изјави за Verywell дека засладените млека од растително потекло можат да содржат значителна количина шеќер. „Ова ќе предизвика скок на гликозата во крвта, особено ако го пиете самостојно“, рече Греј.
Комбинирањето на засладено млеко со храна богата со протеини или растителни влакна може да помогне во ублажување на ефектот, но Греј советува дека секогаш е подобро да се држите до незасладени варијанти. На пример, чаша незасладено соино млеко содржи околу 3 грама природен шеќер, додека чаша засладена верзија има 11 грама, од кои поголемиот дел е додаден шеќер.
Алтернативи на соино млеко
За оние кои се алергични на соја или оние на кои не им се допаѓа вкусот, добра алтернатива за регулирање на шеќерот во крвта е незасладеното бадемово млеко. Има помалку протеини од соиното млеко, но содржи здрави масти и е многу ниско во јаглехидратите, вели Шерон Греј. Другите млека на растителна основа не нудат исти придобивки.
Една чаша оризово млеко има 22 грама јаглехидрати, речиси 13 грама шеќер и помалку од еден грам протеини. Една чаша овесно млеко има 16 грама јаглехидрати, 7 грама шеќер и 3 грама протеини.
„Некои луѓе пијат кокосово млеко“, вели Греј, додавајќи: „Нема многу јаглехидрати, но е многу богато со заситени масти, па затоа не се препорачува како главен пијалок“.
