„Ние сме лоши момци, но се бориме против навистина лоши момци“, рече Капустин, руски милитант кој предводеше паравоени упади во Русија од украинска територија.
Командантот на Рускиот доброволен корпус (РДК) Денис Капустин загина за време на борбена мисија на бојното поле во Запорожје ноќта помеѓу 26 и 27 декември. Веста ја објави неговата единица. Според првите информации, Капустин загинал како резултат на ударот на дронот ФПВ.
Од единицата изјавија дека подоцна ќе објават повеќе детали, додека се утврдуваат сите околности на инцидентот.
„Сите детали ќе бидат објавени подоцна додека се утврдуваат околностите на инцидентот. Ќе се погрижиме да те одмаздиме, Денис“, се вели во соопштението на корпусот.
Кој беше Капустин?
„Ние сме лошите момци, но се бориме против навистина лошите момци“, рече минатата година Капустин, руски милитант кој предводеше паравоени упади во Русија од украинска територија. РДК е најголемата од трите антируски паравоени групи што се борат на страната на Украина.
Капустин претходно изјави дека во филмовите има само добри и лоши момци облечени во црно, но дека тој сака да биде „црн херој кој се бори за доброто“. Тој исто така водеше моден бренд кој продаваше маици и капи со симболи на бел национализам и ксенофобија, вклучувајќи го и нацистичкиот симбол 88. Тој ја отфрнуваше неонацистичката етикета.
Фудбалски хулиган, поврзан со неонацисти
РДК на Капустин и две други антипутински паравоени групи во Украина – Легијата „Слобода на Русија“ и Сибирскиот баталјон – се најдоа во центарот на вниманието откако ги извршија најголемите прекугранични упади во Курскиот и Белгородскиот регион на 12 март 2024 година, каде што се бореа повеќе од две недели. Пред тоа, нивниот најголем упад беше во мај 2023 година.
„Ние сме дел од украинската армија, но имаме сериозни политички амбиции – да маршираме кон Москва и да го собориме режимот на Путин. Ова е во интерес на Украина“, рече Капустин.
Капустин е роден во Москва, а на 17-годишна возраст се преселил во Келн, Германија. Таму стекнал репутација на уличен борец и скинхед, учествувајќи во немири на фудбалски натпревари и на Европското првенство во Марсеј во 2016 година. Во 2019 година, Германија му ја одзеде дозволата за престој и му забрани влез во Шенген поради „дејствување спротивно на либерално-демократскиот устав“.
Тој беше поврзан и со американски неонацистички групи, но ја отфрнуваше неонацистичката етикета и уживаше во провокациите на новинарите.
Тој се опиша себеси како руски националист кој се бори за Украина бидејќи верува дека „вистинските руски националисти треба да се спротивстават на Путин“.
„Со сигурност знам дека Путин е најлошото нешто што може да ѝ се случи на Русија. Затоа моите поранешни соборци, кои се борат за него и се сметаат себеси за националисти, се мои најголеми непријатели. Тие ме сметаат за предавник, а јас нив ги сметам за предавници“, објасни тој.
Според него, „режимот на Путин не е доволно националистички“.
The post КОЈ БЕШЕ УБИЕНИОТ КОМАНДАНТ НА РУСКИОТ КОРПУС, ДЕНИС КАПУСТИН? Започнал како хулиган, се борел на страната на Украина, сакал да го собори Путин appeared first on Во Центар.
