Венецуелскиот претседател Николас Мадуро изјави за венецуелските медиуми дека кампањата предводена од Доналд Трамп ги вовлекува САД во „вечна војна“ слична на онаа во Ирак.
За време на едночасовното телевизиско интервју, Мадуро одби да ги потврди извештаите за наводен американски напад, што би бил прв на венецуелска територија откако Трамп ја започна својата петмесечна кампања на воен притисок.
„За ова би можеле да разговараме за неколку дена“, рече Мадуро, одговарајќи на прашање за тајната операција на ЦИА.
Мадуро ги отфрли тврдењата на САД што ја оправдуваат кампањата на Трамп дека тој бил на чело на „наркотерористичка“ криминална организација што ги преплавува САД со дрога. Тој рече дека верува оти вистинската цел на Вашингтон е да ја преземе контролата врз ресурсите на Венецуела, вклучувајќи ја нафтата, златото и ретките метали.
„Бидејќи не можат да ме обвинат мене или да ја обвинат Венецуела дека поседува оружје за масовно уништување, бидејќи не можат да нè обвинат нас дека поседуваме нуклеарни ракети или хемиско оружје, тие измислија тврдење за кое САД знаат дека е лажно, како и тврдењето за оружје за масовно уништување што ги доведе до вечна војна“, рече Мадуро.
Во овој дел, Мадуро се осврна на американската кампања за соборување на режимот на Садам Хусеин во Ирак под лажни обвинувања дека официјален Багдад поседува нуклеарно оружје.
„Владата на САД знае дека ако сакаат сериозно да разговараат за договор за борба против трговијата со дрога, ние сме подготвени. Ако сакаат нафта, Венецуела е подготвена за американски инвестиции, како што е случајот со „Шеврон“, кога и да сакаат, каде и да сакаат и како и да сакаат“, додаде Мадуро.
Сепак, кога беше прашан какво влијание имаше кампањата за притисок на Трамп врз неговата физичка и емоционална состојба, Мадуро одговори дека верува во Божјата помош.
„Имам непогрешлив бункер – Семоќниот Бог. Му ја доверив Венецуела на нашиот Господ Исус Христос, Царот на кралевите“, заклучи Мадуро.
Пронајдете не на следниве мрежи:
