Поранешниот министер за земојделство, Љупчо Николовски, упати неколку прашања до МЗШВ во врска со откриените разлики во млечните производи од страна на АХВ.
Во продолжение неговата објава на Фејсбук.
– Како претставник на граѓаните, а пред сѐ заради заштита на јавното здравје, чувствувам обврска и одговорност да реагирам во врска со скандалозниот увоз на млечни производи и констатираните неправилности кои ја вознемирија јавноста.
До Министерството за земјоделство, шумарство и водостопанство и до Агенцијата за храна и ветеринарство ги поставувам следните прашања:
Дали во 2025 и 2026 година се спроведувал РЕДОВНИОТ мониторинг согласно Годишната наредба за извршување на ветеринарни мерки и контроли за заштита на јавното здравје?
Доколку се спроведувал, колку мостри од увезени млечни производи биле земени и анализирани за квалитет и безбедност, односно за присуство на млечна маст, растителни масти, млечни протеини, конзерванси, фосфати и за микробиолошка исправност?
Ако РЕДОВНИОТ мониторинг бил реализиран, како е можно неправилностите да не бидат откриени навреме, туку да се констатираат дури по ВОНРЕДНИОТ мониторинг, спроведен по реакциите и предупредувањата на домашните производители и преработувачи?
Со оглед дека се утврдени неправилности и кај домашни производители, дали воопшто бил спроведуван РЕДОВЕН мониторинг на квалитетот на млечните производи од домашно производство во текот на 2025 и 2026 година?
Граѓаните имаат право да знаат дали институциите навремено и доследно ја извршувале својата законска обврска за контрола на храната што секојдневно завршува на нивните трпези.
Ова се прашања на јавно здравје, безбедност на храната и институционална одговорност.
Дополнително, непостапувањето на институциите при контролата и мониторингот на увозот на млечни производи директно се одразува и врз домашното производство. Домашните млекопреработувачи се соочуваат со зголемени залихи, намален пласман и намален откуп на сурово млеко, што создава дополнителен притисок врз откупните цени.
Во комбинација со неисплатените субвенции за млечни крави и за произведено и предадено млеко, состојбата во сточарскиот сектор бележи сериозно влошување, а македонските фармери се оставени сами да се справуваат со неизвесноста и последиците од погрешните политики и институционалната неажурност.
Затоа барам Министерството за земјоделство и Агенцијата за храна и ветеринарство веднаш, целосно и транспарентно да ги објават сите резултати од редовните и вонредните контроли, како и сите преземени мерки.
Јавното здравје е над сѐ.
Одговорност мора да има.
