Сојузниците на Украина ја осудија Русија за ракетниот напад на украинскиот град Суми, во кој загинаа 34 лица, меѓу кои и две деца, а 117 беа ранети. Во раните утрински часови, две балистички ракети го зафатија центарот на градот, удирајќи блиску до државниот универзитет и конференцискиот центар, расфрлајќи крвави тела по улиците. Претседателот на САД, Доналд Трамп, го оцени нападот како „ужасно дело“, додека идниот германски канцелар, Фридрих Мерц, ја обвини Русија за воен злостор. Овој настан се случува додека САД, кој е главниот воен сојузник на Украина, се обидува да прекине со војната која трае четири години, преку преговори водени од Трамп, како што извести Би-Би-Си. Претседателот Трамп изјави за нападот дека е „ужасен“ и дека бил информиран за „настаната грешка“, но не сподели повеќе детали. Специјалниот пратеник на Трамп за Украина, пензионираниот генерал-потполковник Кит Келог, рече дека нападот преминал „секоја граница на пристојност“. Украинскиот претседател Володимир Зеленски апелираше до Трамп да ја посети Украина и да го види разорувањето предизвикано од руската инвазија. Мерц, кој се очекува да стане германски канцелар, за германскиот јавен радиодифузер АРД изјави дека нападот е „тежок воен злостор“. Претседателот на Франција Емануел Макрон го обвини Русија за „непочитување на човечките животи, меѓународното право и дипломатските напори на Трамп“. Потоа, францускиот претседател изјави дека се потребни итни мерки за имплементација на прекин на огнот. Претседателката на Европската комисија Урсула фон дер Лајен го окарактеризираше нападот како „варварски“, и додаде дека „силни мерки се неопходни за прекин на огнот и завршеток на крвопролевањето“. Британскиот премиер сер Кир Стармер исто така изрази згрозеност од нападите на Русија врз цивилното население во Суми. Портпаролот на генералниот секретар на ОН, Антонио Гутереш, изјави дека е „длабоко вознемирен и шокиран“ од вестите за нападот, напоменувајќи дека нападите врз цивили се строго забранети според меѓународното хуманитарно право.
Пронајдете не на следниве мрежи:
