Украина би можела да добие финансиска помош од Европската Унија за да ги продолжи своите воени напори дури и ако Унгарија и Словачка го блокираат планираниот заем од 90 милијарди евра, објавува Политико, повикувајќи се на дипломатски извори од ЕУ.

Според двајца европски дипломати, балтичките и нордиските земји разгледуваат план да ѝ обезбедат на Украина доволно средства за финансирање на своите потреби во првата половина од годината, доколку Будимпешта и Братислава не одобрат заеднички заем на самитот на ЕУ во Брисел следната недела. Лидерите на ЕУ треба да се состанат во Брисел за да се обидат да ги убедат унгарскиот премиер Виктор Орбан и словачкиот премиер Роберт Фицо да го поддржат заемот, кој би обезбедил околу две третини од средствата што ѝ се потребни на Украина за да продолжи да се брани од руска инвазија до крајот на 2027 година.

Според изворите на Политико, балтичките и нордиските земји разгледуваат заем од околу 30 милијарди евра, една третина од вкупниот пакет помош што ЕУ го планира за Украина. Бидејќи заемите би биле билатерални, тие нема да бараат согласност од сите земји-членки на ЕУ. Според правилата на ЕУ, секоја земја-членка може да го блокира заедничкиот заем од 90 милијарди евра, бидејќи еден од правните акти што овозможуваат исплата на средствата бара едногласна поддршка од сите земји-членки. „Ова не е прв пат да се соочуваме со слични тешкотии со Унгарија. Ќе го обезбедиме овој заем на еден или друг начин“, рече европскиот комесар за економија Валдис Домбровскис.