Православните верници денес ќе го прослават Божиќ, одбележувајќи го раѓањето на Исус Христос, како еден од најважните и најрадосните христијански празници, според јулијанскиот календар.
Верниците традиционално се поздравуваат едни со други за Божиќ со „Мир Божји, Христос се роди – Вистина се роди“.
Најрадосниот христијански празник на 7 јануари го слават, покрај Македонската православна црква Охридска архиепископија и Српската православна црква, и Руската православна црква, Ерусалимската патријаршија, Света Гора, старокалендарците во Грција и египетските копти, кои го почитуваат јулијанскиот календар.
ВО Македонија , Божиќ и празниците поврзани со него се слават најсвечено и се богати со нашите прекрасни обичаи, што го прави периодот од неколку недели околу Божиќ најубавиот и најсвечен период во целата календарска година.
Божиќ е празник на раѓањето на новиот живот, празник на децата и детството, родителството – татковството и мајчинството, кој кај Македонците е украсен со најубавите религиозни обичаи и ритуали, кои се сведуваат на барање од Бога да го заштити и зголеми семејството и имотот на домаќинот.
Ова е изразено во народната здравица и молитва за Божиќ: „Дај, Боже, здравје и радост на овој дом, нека ни се родат здрави деца, нека нашето жито и лозјата раѓаат плод, нека ни се зголеми имотот на полето, во трлото и во амбарот!“
Божиќ, заедно со Велигден, е еден од најголемите христијански празници и се слави како спомен на раѓањето на Господ Исус Христос, Синот Божји.
Божиќ го означува и моментот кога Бог се појавува во тело како човек, што е еден од централните настани на христијанската вера, бидејќи Бог станува човек за да го врати човекот кај Бога.
Раѓањето на Христос го означува почетокот на делото на спасение на човештвото од гревот и смртта, кое ќе се исполни со Неговото страдање и Воскресение.
Раѓањето на Христос, исто така, го симболизира доаѓањето на светлината во светот кој бил во темнината на гревот, и затоа во црковните служби Божиќ се нарекува и „празник на светлината“.
Христос се раѓа во пештера, во сиромаштија, покажувајќи дека смирението и љубовта се основните христијански доблести.
Македонската православна црква го слави Божиќ три дена.
На божиќно утро, пред зори, сите камбани во православните цркви бијат, најавувајќи го доаѓањето на Божиќ и прославата на Божиќ.
Според календарот на МПЦ (Јулијанскиот календар) денеска е 25 декември.
Денеска е Рождество Христово – Божик.
Името Христос е превод на еврејското Месија, што значи Помазаник. Овој Помазаник, овој Христос, на луѓето им беше ветен уште од времето на Адам. За него пророкуваа многу еврејски пророци, а неговата појава во тоа време ја очекуваа и многу други народи. Пророците го прорекоа како времето кога ќе се роди, така и местото Витлеем. Во тоа мало гратче во Јудеја, денешен Израел, се роди Исус, наречен Христос, т.е. Помазаник, и тој беше исполнување на пророштвата. Подоцна се откри и стана позната низ целиот свет надумната тајна на неговата богочовечка личност. Исус Христос на човештвото му ја даде силата и власта да ги победи гревот и смртта. Заради тоа Христа го нарекуваме спасител. Уште повеќе, влегувањето на Бога во историјата значеше почеток на откривањето на сите тајни и на радоста на вечниот живот.
