СДСМ поднесе кривична пријава против премиерот Христијан Мицкоски за рушење на Уставот и кршење на законите по неговата неодамнешна изјава дека има чувство дека ќе се гонат поранешни функционери на опозицијата.
– Христијан Мицкоски повеќе не се крие –тој е обвинител, судија, кој однапред нарачува судски процеси против опозицијата и неистомислениците. Од позиција на премиер, Мицкоски јавно најавува кривични прогони, таргетира конкретни луѓе од опозицијата и нивните семејства со однапред напишани обвиненија. Неговото „имам чувство“ го диктира стравот затоа што знае дека ќе мора да се соочи со одговорноста. Но, ова е скандал од невидени размери и претставува целосно уривање на правниот и уставниот поредок и за ова мора да понесе одговорност, изјави генералниот секретар на СДСМ Саша Димитријевиќ по поднесувањето на пријавата.
Кривичната пријава, како што изјави, е поднесена за
злоупотреба на службената положба и овластување, повреда на рамноправноста на граѓаните и загрозување на сигурноста.
– Бараме Јавното обвинителство веднаш да постапи по кривичната пријава, да го повика Мицкоски на распит и да се спречи понатамошно загрозување на правниот поредок.
Нека докаже Јавното обвинителство дека никој не е над законите и дека може независно да постапува а не само по нарачки. СДСМ нема да се повлече пред заканите, рече Димитријевиќ.
