Мечка тешка околу 70 килограми била спасена во месноста Чеплес во Велешко, откако се заглавила во нелегално поставена сајла. По интервенцијата на надлежните институции и ветеринар од скопската Зоолошка градина, животното било ослободено и вратено во природата.
Случајот го пријавило Ловечкото друштво „Руен“ од Велес, а информацијата преку Македонското еколошко друштво стигнала до Државниот инспекторат за животна средина. Мечката била пронајдена во близина на рибникот Нежилово, на околу 1,5 километар оддалеченост.
По пријавата, на терен излегле двајца државни инспектори во координација со СВР Велес и ловечкото друштво. Мечката била успиена и прегледана од ветеринар, по што сајлата била отстранета, а животното било пуштено во шумата.
Од Државниот инспекторат за животна средина информирале дека станува збор за машка мечка стара околу три години, кај која не биле забележани видливи повреди од примката.
За случајот бил известен и јавен обвинител од Велес. Полицијата ја одзела нелегално поставената примка за вештачење, со цел да се утврдат околностите и да се преземат понатамошни законски мерки.
