Американскиот претседател Доналд Трамп изјави дека разговарал телефонски со кинескиот претседател Си Џинпинг, меѓу другото, за прашања поврзани со Русија и Украина.

„Имав многу добар телефонски разговор со кинескиот претседател Си. Разговаравме за многу прашања, вклучувајќи ги Украина и Русија, фентанилот, сојата и другите земјоделски производи“, напиша американскиот лидер на социјалната мрежа „Truth“.

Трамп додаде дека тој и неговиот кинески колега се согласиле за важноста на одржувањето редовни билатерални контакти.
Според него, разговорот бил многу позитивен.

„Овој повик беше продолжение на нашата многу успешна средба во Јужна Кореја пред три недели. Оттогаш, постигнат е значителен напредок во одржувањето на билатералните договори актуелни и точни“, напиша Трамп.

Тој, исто така, објави дека кинескиот претседател ќе дојде во Вашингтон на државна посета како одговор на планираната посета на американскиот лидер на Кина во април.

Трамп напиша дека кинескиот лидер го поканил да ја посети Кина во април. „За возврат, тој ќе биде мој гостин на државна посета на Соединетите Држави подоцна оваа година“, додаде Трамп.

Претходно, кинеската новинска агенција Синхуа објави дека двајцата лидери разговарале по телефон.