Големи технички проблеми во системите на „Мајкрософт“ предизвикаа прекин на одредени популарни услуги, поради што милиони луѓе ширум светот не можеа да пристапат до е-поштата на „Оутлок“, платформата „Тимс“ и други алатки важни за секојдневното работење.
Прекинот траеше со часови, а најмногу тешкотии беа пријавени во САД и Австралија. Последиците беа почувствувани во бројни компании, училишта и јавни институции, објавува CNN .
Поради недостапноста на деловните системи, некои вработени во САД беа принудени да го завршат работниот ден порано. Во Австралија, бизнисите имаа проблеми со издавање и печатење фактури, додека некои образовни институции не беа во можност да организираат онлајн часови.
Прекинот влијаеше и на други активности. Имаше прекини во преносот во живо на судските рочишта, проблеми за време на интервјуата за работа од далечина, како и тешкотии во дистрибутивните центри што снабдуваат големи малопродажни синџири.
Мајкрософт објави дека нивните експерти работат на решавање на проблемот и враќање на системот во нормална состојба. Иако првите обиди за обнова на инфраструктурата донесоа одредени резултати, стабилното работење на сите услуги не беше веднаш воспоставено.
– Продолжуваме со нашите напори за подобрување на стабилноста на серверот и протокот на сообраќај – соопшти компанијата преку сметката на Microsoft 365 на социјалната мрежа X.
Како што објаснија, меѓу преземените чекори се прераспределба на оптоварувањето на серверот, прилагодување на управувањето со интернет сообраќајот и ограничување на одредени протоци на податоци. Во некои региони, услугите беа делумно обновени, но целосната стабилизација сè уште не е потврдена.
Овој инцидент повторно го отвори прашањето колку современото работење зависи од неколку големи технолошки компании. Професорот по компјутерски науки на Универзитетот во Мелбурн, Тоби Мареј, предупреди дека неуспесите на ваквите системи би можеле да имаат многу пошироки последици од проблемите со е-поштата.
Според него, недостапноста на Outlook и Teams може сериозно да ја наруши комуникацијата со клиентите, обработката на деловните барања и координацијата на вработените, што директно влијае на продуктивноста на организациите ширум светот.
