Претседателот на СДСМ денеска повтори дека нема никаква врска со било која фирма за марихуана и ја повика Владата да одговори со кои луѓе од сегашната власт е поврзаната фирмата Алфафарм наведена во документ на српското Обвинителство.
– Со кој е таа фирма, која е наведена во документ на српското обвинителство, поврзана? Дали е поврзана со некои луѓе од сегашната власт? праша Венко Филипче денеска на прес-конференција.
Според Филипче, власта прави дефокус од најголемиот нарко-скандал во регионот за да одбегне одговрност за тоа како петте тони дрога ја поминале македонската граница.
– Коментирав неколку пати и ќе го повторам ставот – тоа е апсолутно само една форма на дефокус. Јас немам никаква поврзаност со било која фирма за марихуана во државата. Повторно е тоа обид да се избегне одговорот на вистинското прашање – како пет тони марихуана, 4–5 шлепери, поминале преку граница и завршиле во Србија. Како поминала на полициска контрола? Како поминала на царинска контрола на граница? Тоа се прашањата. Сè друго е голем дефокус, рече Филипче.
Претседателот на СДСМ оцени дека во изминатиот период тој лично и партијата се изложени на лажна кампања и серија фабрикувани обвинувања.
