Под земја, во бункер врежан во карпа и дизајниран да издржи дури и нуклеарен или биолошки напад, Финска се подготвува за сценарио кое до неодамна изгледаше незамисливо: голема безбедносна криза со Русија.
Повеќе од 2.000 луѓе, вклучувајќи војници, волонтери и студенти, учествуваа во најголемата вежба за цивилна заштита одржана во Европа од крајот на Втората светска војна.
Во градот Куопио, властите симулираа воена ситуација каде што критичната инфраструктура, вклучувајќи ги снабдувањето со електрична енергија и вода, е погодена од кибернапади, додека градот се соочува со закана од ракетни напади од Русија.
Во едно од подземните засолништа, кое вообичаено служи како спортска сала и може да прими до 7.000 луѓе, стотици луѓе преноќиле во импровизирани кревети. Војниците, опремени со маски и заштитни одела, вежбале и мерење на зрачењето и процедурите што ќе се следат во случај на напад.
Но, Финска не се подготвува само за ракети. Властите посериозно ги сфаќаат и хибридните закани: кибер напади, саботажа на инфраструктурата, прекини на електричната енергија и сомнителна активност на беспилотни летала, објавува „Телеграф“.
Финска дели граница со Русија долга повеќе од 1.300 километри, од Балтичкото Море до Арктикот. По целосната руска инвазија на Украина во 2022 година, Хелсинки радикално ја промени својата безбедносна политика и, заедно со Шведска, се приклучи на НАТО во 2024 година.
За поранешниот полковник на финската армија, Аско Мухонен, одбраната на земјата зависи не само од армијата, туку и од подготвеноста на граѓаните да реагираат во случај на криза.
„Не верувајте во она што го кажуваат, туку гледајте што прават“, е неговата порака кога зборува за Москва.
Финските енергетски компании, исто така, пријавуваат зголемување на сајбер нападите од почетокот на војната во Украина. Во некои области, сомнителни знаци се пронајдени во близина на енергетската инфраструктура, додека беспилотни летала се видени како летаат над далноводи, иако сторителите не се идентификувани.
Властите нагласуваат дека не е можно да се спречи секоја закана. Поради оваа причина, граѓаните се обучуваат да можат да се справат најмалку 72 часа без помош, во случај да снема струја или водата да стане неупотреблива за пиење.
Вежбата има и емотивна димензија. Финска од прва рака ги знае последиците од конфликтот со Русија. Во војните против Советскиот Сојуз, земјата изгуби околу 11 проценти од својата територија, а повеќе од 400.000 луѓе беа принудени да ги напуштат своите домови.
Сега, помладите генерации учат како да преживеат потенцијална криза.
The post Финска ја одржува најголемата вежба за цивилна одбрана во Европа од Втората светска војна appeared first on Во Центар.
