Кога луѓето ќе помислат на здравјето на мозокот, првото нешто што им паѓа на ум се активности за тренирање на умот како крстозборки или судоку. Сепак, одржувањето на бистар ум бара повеќе од само повремена ментална вежба, бидејќи секојдневните навики, особено исхраната, играат клучна улога.
Иако повремената консумација на храна што не е идеална за мозокот нема да предизвика штета, експертите за здравје на мозокот, како што се невролозите и невронаучниците, се обидуваат да избегнуваат некои многу популарни видови храна и пијалоци.
Протеински прав
Дали имате навика да додавате протеински прашок во вашите смутија? Можеби е време да размислите повторно за таа навика или барем да ги проверите состојките. Иако протеинските прашоци често се рекламираат како здрав избор за слабеење или одржување на тежината, невронаучникот Фридерике Фабритиус предупредува дека многу од нив се полни со вештачки засладувачи.
„Овие адитиви се она што ме прави претпазлив кон протеинските прашоци бидејќи го нарушуваат цревниот микробиом“, изјави Фабритиус за HuffPost. „Здравиот и отпорен цревен микробиом е исклучително важен за доброто здравје на мозокот бидејќи повеќето од нашите невротрансмитери се произведуваат во цревата.“
Газирани пијалоци
Неврологот д-р Шахин Лакан вели дека вашите омилени газирани пијалоци се едноставно лоши за мозокот.
„Газираните пијалоци се меѓу најлошите намирници за здравјето на мозокот поради нивната висока концентрација на едноставни шеќери кои ги оштетуваат крвните садови што го снабдуваат мозокот“, рече тој.
„Со текот на времето, ова го лишува мозокот од горивото што му е потребно за да функционира, што доведува до предвремена деменција и мозочни удари. Акутно, шеќерот предизвикува и воспаление на мозокот, раздразливост, лошо расположение и нарушувања на спиењето“, додава тој.
Постојаните скокови и падови на нивото на шеќер можат да бидат зависност, а диеталните верзии на сокови не се решение.
„Дури и диеталните или „нулти“ верзиите имаат негативни ефекти бидејќи адитивите без калории го преоптоваруваат мозокот и го лажат да јаде повеќе калории и да посакува вистински шеќер“, објасни Лакан.
Маргарин
Држете се подалеку од замени за путер. Неврологот д-р Шеј Дата вели дека избегнува маргарин секогаш кога е можно бидејќи содржи транс масти. Сепак, вреди да се напомене дека сега постојат алтернативи на путерот кои не содржат транс масти, па затоа е клучно внимателно да ги читате етикетите.
„Често слушаме дека транс мастите се лоши за срцето и крвните садови. Истото важи и за крвните садови во мозокот“, рече таа.
,,Студија објавена во списанието Neurology покажа дека постарите возрасни лица со највисоки нивоа на елаидна киселина, вообичаен вид транс масти, во крвта имаат поголема веројатност да развијат деменција. Подобро е да се држите до маслиново масло и вистински путер.“
Пиво
Ова лето, можеби ќе сакате да го прескокнете пивото на дружењата.
„Пивото е само празни калории без хранлива вредност“, вели д-р Бајран Хо, невролог и директор на Програмата за нарушувања на движењето во Медицинскиот центар Тафтс.
„Алкохолот е невротоксин кој може да го оштети и централниот и периферниот нервен систем, дури и кога се консумира во умерени количини“, предупредува Хо.
Безкофеинско кафе
Ако сакате кафе без кофеин, невронаучникот и извршен директор на „Елипса аналитика“, Шон Калан, советува да го избегнувате освен ако не сте сигурни дека не се користени растворувачи во процесот на безкофеинизирање.
„Растворувачите, хемикалиите што се користат за отстранување на кофеинот од кафето, генерално се токсични за луѓето“, рече тој.
,,Многу од нив се поврзани со зголемен ризик од рак или невролошко оштетување, особено при високи или повторени дози. Дополнително, познато е дека растворувачите како што е метилен хлоридот, кој често се користи во овој процес, ја преминуваат плацентата, што значи дека бремените жени ризикуваат да го изложат своето неродено дете на хемикалијата.“
помфрит
Еве уште лоши вести: помфритот е една од главните намирници што неврологот д-р Педрам Наваб ги избегнува.
,,Исхраната што вклучува масна храна како што е помфритот може да ги оштети крвните садови што го снабдуваат мозокот, со што предизвикува когнитивно оштетување“, рече тој.
„Таквата исхрана го намалува интегритетот на крвно-мозочната бариера и доведува до оштетување на невроните во хипокампусот, дел од мозокот клучен за учење и меморија“, објасни Наваб.
Иако некои од овие намирници, како што се протеинскиот прав или кафето без кофеин, може полесно да се откажат, други може да бидат потешки. Затоа е важно да запомните дека треба да ги консумирате вашите омилени јадења и пијалоци што можат да му наштетат на здравјето на мозокот во умерени количини и да избирате поздрави верзии секогаш кога е можно.
The post Што го оштетува мозокот? Шест намирници што невролозите не ги препорачуваат appeared first on Во Центар.
