Манчестер Јунајтед потврди дека Мајкл Карик ја напуштил позицијата главен тренер на првиот тим, а клубот како причина го наведе лошиот почеток на сезоната. Траен наследник ќе биде назначен што е можно поскоро.
Карик се врати во клубот во јануари и го предводеше тимот до третото место во Премиер лигата. Во преостанатите 17 натпревари минатата сезона, тој забележа 12 победи и собра најмногу бодови во лигата во тој период, се вели во соопштението за медиумите на клубот.
We can confirm Michael Carrick has departed his role as men’s first-team head coach.— Manchester United (@ManUtd) November 12, 2026
Јунајтед во соопштението изјави дека по разочарувачкиот почеток на новата сезона, дошле до исклучително тежок заклучок дека промените се неопходни за да ги остварат своите амбиции.
„Мајкл е, и секогаш ќе биде, легенда на Манчестер Јунајтед. Како и во неговите играчки денови, за време на неговото враќање во клубот, тој ги одржуваше највисоките стандарди на посветеност и професионализам. Неговото лидерство и достигнувања минатата сезона ќе останат со задоволство запаметени“, се вели во соопштението.
Клубот соопшти дека има намера што поскоро да назначи постојан наследник. Британските медиуми пишуваат дека Маурисио Покетино постигнал договор со Јунајтед за преземање на тимот, што клубот не го потврдил.
Карик го презеде тимот во јануари по заминувањето на Рубен Аморим, а во мај, според медиумите, потпиша договор до 2028 година. Последниот натпревар под негово водство беше нерешен резултат 4:4 против Астон Вила во неделата, а според британските медиуми, Јунајтед имаше осум бода по десет кола. Следниот натпревар е против Ливерпул на „Енфилд“ на 22 ноември.
