Пратеничка во Бундестагот: Германија стана борделот на Европа

Пратеничката на парламентарната група демохристијани (ЦДУ/ЦСУ) во германскиот Бундестаг Дороти Бар повика на забрана за купувањето сексуални услуги во таа земја.

Таа на овој начин сака да им помогне на илјадници жени, да ги заштити од насилство и да ги ослободи од зависноста од криминалците, пишува Билд.

Пратеничка во Бундестагот: Германија стана борделот на Европа

„Итно ни е потребна промена на парадигмата: забрана за купување сексуални услуги во Германија“, кажа Бар за германскиот весник. „Тоа де факто би ја забранило проституцијата – за доброто на жените“.

Ситуацијата за проститутките во Германија во моментов е „драстична“, кажа германската пратеничка. Според проценките кои ги изнесе, во таа земја во моментов има околу 250.000 проститутки, од кои повеќето доаѓаат од странство.

Само десет отсто од нив се пријавени, додека останатите живеат во илегала, наведува Билд. Проституцијата во Германија е легална од 2002 година, од кога законски повеќе не се смета за неморална.

Бар изјави дека поради тоа „Германија се претворила во борделот на Европа“, и дека станала исклучително атрактивна земја за сексуален туризам.

Таа додаде и дека повеќето жени кои се бават со проституција во Германија се измамени со лажни ветувања, како и дека се присилени да ја работат таа работа.

„Тоа е трговија со луѓе среде Европа, налик на ропство“, истакна германската пратеничка. „Жените таму се третираат на најлош можен начин“.

Бар, како и други германски пратеници, сакаат да го сменат законот за проституција и да воведат таканаречен нордиски модел, кој не ги казнува проститутките туку нивните муштерии.

Во Шведска, откако беше воведена забрана за купување секс, „бројот на проститутки драстично опадна“, изјави Бар.

Таа додаде и дека „не може да има вистинска еднаквост сè додека прифаќаме стотици илјади жени да се третираат како робови“.

Пронајдете не на следниве мрежи:©ПУЛС24.MK Вестите на интернет страницата на редакцијата ПУЛС24.MK може да се користат исклучиво за лично информирање. Без писмена дозвола од ПУЛС24.MK или посебен договор, не е дозволено преземање, користење или реемитување на вестите.