Украинските медиуми објавија вознемирувачки снимки од местото на убиството на поранешниот пратеник Илја Кива, кој пребегнал во Русија.
Изворите на Канал 24 тврдат дека зад „специјалната операција“ стои украинската СБУ и дека акцијата се подготвувала подолго време.
На една од фотографиите се гледа телото на опозиционерот како лежи во снегот со дамки од крв наоколу. Медиумите објавија и фотографии од пиштолот закачен на дрвото со кое наводно бил убиен. Објавена е и снимка која наводно ја снимил атентаторот додека чекал да дојде Кива.
Канал 24 пренесува дека Кива е убиен во московскиот регион недалеку од местото каде што снимал пропагандни пораки против Украина. Според извори на Канал 24, Кива бил една од приоритетните цели и бил ликвидиран и покрај бројните обезбедувачи.
– Ова е сигнал до сите предавници и воени злосторници кои заминаа на страната на непријателот. Русија нема да ве заштити – рекол извор од разузнавачките служби.
СБУ се огласи и на својот канал на Телеграм
– Службата за безбедност на Украина спроведува многу успешни специјални операции, тајно и тивко, со цел да им донесе заслужена казна на воените негативци и непријателите на Украина. Шефот на СБУ, Васил Маљук, претходно изјави дека нивната единствена перспектива е смртта, а тоа можеме да им го пренесеме на окупаторите и нивните соучесници. Васил Маљук, исто така, постојано нагласуваше дека непријателите на Украина дефинитивно ќе ги платат своите злосторства пред Бога и пред украинскиот народ според законот и моралот. Состојбата со ликвидацијата на Илја Кива дополнително ги потврдува тие зборови. И сите детали за специјалните операции на СБУ ќе бидат откриени по нашата неизбежна победа – изјавија СБУ.
Кива на 6 декември беше пронајден мртов во Подмосковље во паркот на хотел во селото Супонево. Руските власти соопштија дека на телото се пронајдени две рани од куршуми и најавија почеток на истрага.
Кива, поранешен полицаец и политичар, често се појавуваше во емисиите на руската државна телевизија во последниве години, критикувајќи ги потезите на Киев и упатувајќи обвиненија против украинскиот претседател Володимир Зеленски.
Пронајдете не на следниве мрежи:
