Израелските сили опколија уште две болници во Газа во неделата, блокирајќи ги здравствените работници со силен оган, соопшти палестинската Црвена полумесечина, додека Израел тврди дека заробил 480 милитанти во судирите во главната болница „Ал Шифа“.

Израел тврди дека болниците во палестинската енклава, каде што војната беснее повеќе од пет месеци, ги користат милитантите на Хамас како нивни бази. Хамас и медицинскиот персонал ги негираат наводите.

Палестинската Црвена полумесечина соопшти дека еден од членовите на нејзиниот персонал е убиен кога израелски тенкови ненадејно упаднале во областите околу болниците „Ал-Амал“ и „Насер“ во јужниот град Кан Јунис, по жестокото гранатирање.

Израелските вооружени сили ја блокираа болницата „Ал Амал“ и почнаа со операции во нејзина близина, соопшти Црвената полумесечина. „Нашите тимови се во екстремна опасност во моментов и се целосно блокирани“, се додава.

Црвената полумесечина натаму наведува дека израелските сили сега бараат целосна евакуација на персоналот, пациентите и раселените лица од болницата „Ал Амал“ и почнале да истрелуваат чадни бомби за да ги истераат луѓето од болницата.

Министерството за здравство на енклавата соопшти дека десетици пациенти и медицински персонал биле приведени од израелските сили во „Ал Шифа“ во северниот град Газа.

Канцеларијата за медиуми на Хамас соопшти дека израелските сили убиле пет палестински лекари за време на нивниот седумдневен напад на Ал Шифа.

Израелската војска не одговорила веднаш на барањето на Reuters за коментар, но претходно соопшти дека убила „170 вооружени мажи“ во рацијата во која загинале пет пациенти, според палестинското Министерство за здравство.

„Ал Шифа“ е една од неколкуте делумно функционални болници во Појасот Газа и, како и другите, обезбедува засолниште за некои од речиси двата милиона бегалци во малата пренаселена енклава.