„Поради покажани деформации и пукнатини на потпорен ѕид на еден подвозник на скопската обиколница на државниот пат А2“, Јавното претпријатие за државни патишта презело активности кои вклучувале увид во санацијата на ѕидот од страна на тројца високи функционери – директорот на ЈПДП, Коце Трајановски, градоначалникот на Општина Ѓорче Петров, Александар Стојкоски и пратеникот од ВМРО-ДПМНЕ Бојан Стојаноски.

-Согласно со проект предвидено е репроектирање на површинскиот канал за насочување на водата кон пропустот; чистење на постоечкиот пропуст; реконструкција на централната дренажа во телото на патот; реконструкција на левата дренажа; отстранување на постојната, вклучително и шахтите, и поставување нова линија со цевки; реконструкција и рехабилитација на коловозната конструкција; санација на пукнатини на крајниот столб на потпатникот со инектирање; изведба на дополнителни барбакани за дренажа на водите од телото на насипот, итн., велат од ЈПДП.

Санацијата на подвозникот ќе чини околу 300.000 евра, а таа ќе трае цела година.