Невообичаена ситуација се случи вчера во главниот град на Јужна Кореја, Сеул, кога тројца милијардери ги изненадија посетителите на популарен ресторан за брза храна и платија вечера за сите присутни.
Станува збор за Јенсен Хуанг, извршен директор на „Нвидија“, компанијата што моментално е највредна во светот, и двајца лидери на јужнокорејските технолошки гиганти: Ли Џе-јонг, претседател на „Самсунг“ и Чунг Еуи-сун, извршен претседател на „Хјундаи мотор груп“.
Триото уживаше во „чимаек“, популарна комбинација од пржено пилешко и ледено ладно пиво што мора да ја пробаат посетителите на Јужна Кореја. Тие ручаа во „Кканбу Чикен“ во центарот на Сеул, непосредно пред самитот на АПЕК во Гјонгџу.
„Обожавам пржено пилешко и пиво со пријатели, па затоа Кканбу е совршено место, нели?“, им рече Хуанг на насобраните по пристигнувањето во ресторанот. Името на ресторанот, „Кканбу“, е исто така разговорлив термин за многу близок пријател.
Според извештајот на националната новинска агенција Јонхап, тројцата јаделе топчиња од сирење, стапчиња од сирење, пилешко без коски и традиционално пржено пилешко, заедно со корејско пиво Тера и локалниот алкохолен пијалок соџу.
Видеата од локалните медиуми го прикажуваат триото, чие вкупно богатство е 195 милијарди долари, како ги креваат чашите во знак на пријателство, обичај што симболизира блискост додека пијат во Јужна Кореја.
Хуанг, Ли и Чунг излегоа и им понудија на толпата стапчиња од пилешко и сирење. Хуанг рече: „Крилцата беа одлични. Дали сте биле тука порано? Неверојатно е, нели?“
Церемонијата на „златното ѕвонче“, кога Хуанг симболично ја плати сметката за сите присутни во ресторанот, предизвика посебен ентузијазам. Според извештаите на Јонхап, Ли всушност ја платил првата сметка, додека Чунг го покрил вториот круг.
Самитот на АПЕК во Гјонгџу ги собра другите светски лидери, вклучувајќи го и кинескиот претседател Си Џинпинг, кој неодамна имаше напнати трговски разговори со американскиот претседател Доналд Трамп.
На самитот, Хуанг се сретна и со претседателот на Јужна Кореја, Ли Џе Мјунг, и најави дека Nvidia ќе испорача повеќе од 260.000 графички процесори на јужнокорејски компании, вклучувајќи ги и компаниите на неговите колеги од вечерата. Компанијата, како што објави кабинетот на претседателот, ќе соработува со Samsung, Hyundai, како и со локалните гиганти Naver и SK за развој на технологии за вештачка интелигенција, вклучувајќи автономни возила.
The post Невообичаена ситуација: Тројца милијардери ручале во ресторан во Сеул и ја платиле сметката за сите гости appeared first on Во Центар.
