Јапонската премиерка Санае Такаичи денес објави дека ставот на Јапонија за Тајван останува непроменет, повикувајќи се на заедничката декларација на Јапонија и Кина од 1972 година, според која Јапонија го почитува ставот на Кина за статусот на Тајван , пишува хонгконшкиот весник „Саут Чајна Морнинг Пост“.
„Основната позиција на јапонската влада во однос на Тајван останува како што е наведено во заедничката изјава на Јапонија и Кина од 1972 година и нема промена во таа позиција“, изјави Такаичи пред јапонскиот парламент.
Во соопштението на двете земји се вели дека „владата на Народна Република Кина повторува дека Тајван е неотуѓив дел од територијата на Народна Република Кина“ и дека јапонската влада „целосно го разбира и почитува тој став“.
Потпишувањето на заедничката изјава доведе до нормализација на односите меѓу официјален Пекинг и Токио.
Денешната изјава на јапонската премиерка дојде откако таа им кажа на јапонските пратеници пред речиси еден месец дека кинескиот напад врз Тајван може да биде „ситуација што го загрозува опстанокот“ на Јапонија, што би можело да му овозможи на Токио воено да се вклучи.
Тоа беше најјасната изјава на премиерот Такаичи за можниот одговор на Јапонија на евентуален кинески напад врз Тајван и означи отстапување од долгогодишната стратешка нејасност на земјата по ова прашање.
The post ЈАПОНСКАТА ПРЕМИЕРКА: Ставот на Јапонија кон Тајван останува непроменет appeared first on Во Центар.
