Иранскиот шампион во бокс, Мохамед Џавад Вафаеи Сани, е во сериозна опасност да биде погубен во Иран, објави „Гардијан“.
Вафеи Сани има 30 години, а беше уапсен во 2020 година за учество во протести против иранските власти, односно протести „за демократија“. Боксерот е обвинет за поддршка на Организацијата на народни муџахедини на Иран (МЕК), која Иран ја етикетира како терористичка.
Тој со години бил мачен во затвор, а сега се соочува со егзекуција откако Врховниот суд на Иран го отфрли неговото барање за повторно судење.
Вафеи бил мачен и држен во самица пет години, а неговото барање за ново судење било одбиено на 15 декември. Истиот ден, на неговата мајка неочекувано ѝ била одобрена посета, што во Иран се смета за знак дека наскоро ќе биде погубен. Телефонски повик од затворот ѝ кажал дека неговиот случај е проследен до затворското одделение во Машхад.
„Животот на Вафаеи Сани е во голема опасност, а неговата егзекуција може да биде извршена во секој момент“, предупреди Шахин Гобади, член на Комитетот за надворешни работи на Националниот совет за отпор на Иран, коалиција на опозициски движења.
Гобади потсети дека во текот на изминатите шест години, иранските власти користеле тешки форми на тортура за да го принудат да се откаже од Народната муџахединска организација на Иран (МЕК).
Вафаеи Сани беше осуден за корупција и беше осуден на смрт по трет пат во септември 2024 година, по, според Амнести Интернешнл, „екстремно нефер судење“. Врховниот суд на Иран ја потврди смртната казна на 4 октомври.
Насим Папајани, виш активист на Амнести Интернешнл за Иран, ги повика иранските власти веднаш да ги запрат сите планови за егзекуција на Вафаеи Сани и да ја поништат неговата пресуда и смртна казна.
„Амнести Интернешнл постојано утврдува дека ова обвинение не ги исполнува принципите на легалност и јасност што ги бара меѓународното право. Нашето истражување постојано покажува дека револуционерните судови немаат независност и дека изрекуваат строги казни по крајно нефер судења. На лицата судени пред ваквите судови систематски им се одзема правото на фер судење, вклучително и на Вафаеи Сани“, рече Папајани.
Во ноември, повеќе од 20 освојувачи на олимписки медали, тренери и други меѓународни спортисти, вклучувајќи ја тенисерката Мартина Навратилова и пливачката Шерон Дејвис, потпишаа писмо со кое бараат итно запирање на неговата егзекуција.
Инаку, Мохамед Џавад Вафаеи Сани е ирански боксер од градот Машхад кој во текот на својата кариера освојувал титули на разни локални натпреварувања и бил почитуван како перспективен спортист, а подоцна работел како тренер по бокс и им предавал самоодбрана на децата.
Откако беше приведен во март 2020 година за учество во антирежимски протести во 2019 година, тој повеќе не беше во можност да ја продолжи својата спортска кариера.
The post Иранците ќе погубат шампион во бокс (30), тврдејќи дека соработувал со терористи appeared first on Во Центар.
