Додека повеќето луѓе ја слават Нова Година еднаш, има и такви што ја слават двапати. Причината за ова не е патувањето низ времето, туку невидлива линија што ги сече океаните и одредува кога започнува нов календарски ден.Земјата е поделена на 24 главни временски зони, но нивните граници не се правилни. Тие се виткаат и се прилагодуваат на земјите и регионите, а клучна улога во оваа поделба игра меѓународната датумска линија, имагинарна граница што го означува почетокот на новиот ден и се протега од исток кон запад.
Одговорот на прашањето кој прв ја дочекува Новата година води кон Кирибати, мала островска нација со приближно 120.000 жители. Иако непозната за многумина, оваа земја има привилегија да биде првата што ќе зачекори во новата година. Во нејзините населби со необични имиња како што се Банана, Лондон и Париз, огнометите и прославите започнуваат порано од кое било друго место на планетата.
Меѓународната датумска граница некогаш го преминувала Кирибати, што значело дека жителите на истата држава живееле во различни календарски денови.
За да се избегне ситуација во која главниот град и другите населени места се одвоени 24 часа, линијата е поместена за неколку илјади километри, поради што денес изгледа невообичаено закривено.
По Кирибати, Новата година пристигнува во Нов Зеланд, потоа во Австралија и Азија, а потоа полека се движи кон Европа и Африка. Само неколку часа подоцна стигнува до Северна и Јужна Америка. Кога поголемиот дел од светот веќе живее во новата година, прославата конечно стигнува до последното населено место, а тоа е Американска Самоа.
Американска Самоа е територија на Соединетите Американски Држави, а особено е интересно што само 70 километри оддалечена, од другата страна на меѓународната датумска линија, се наоѓа независната држава Самоа. Иако речиси „на растојание од едната рака“, меѓу нив постои временска разлика од дури 25 часа.
Поради ова, некои ја користат ретката можност прво да ја дочекаат Новата година во Самоа, а потоа да патуваат со брод или авион до Американска Самоа и повторно да ја прослават, практично враќајќи се еден ден наназад.
Има места каде што Новата година доаѓа уште подоцна. Островите Бејкер и Хауланд, исто така територии на САД, ја дочекуваат еден час по Американска Самоа. Сепак, бидејќи се ненаселени, единствените „славители“ таму се птиците.
The post Иако се оддалечени само 70 километри, Самоа и Американска Самоа ја слават Новата година со разлика од 25 часа appeared first on Во Центар.
