Претседателот на Соединетите Американски Држави, Доналд Трамп, објави на социјалната мрежа Truth Social фотографија од венецуелскиот претседател Николас Мадуро на американскиот воен брод USS „Иво Џима“.
На фотографијата Мадуро е прикажан во тренерка, со лисици на рацете, шише со вода во раката и очила што му служат како превез за очите.
Соопштението на Трамп следеше по неговата претходна порака во која тој изјави дека венецуелскиот претседател Николас Мадуро и неговата сопруга се заробени и се на пат кон Њујорк, по, како што наведе, моќните напади извршени на територијата на Венецуела.
Американскиот претседател не даде дополнителни детали, а во моментов се чека неговата официјална прес-конференција.
Генералната обвинителка на Соединетите Американски Држави, Памела Бонди, претходно зборуваше за акцијата на американските сили во која беа приведени венецуелскиот претседател Николас Мадуро и неговата сопруга. Таа изјави дека обвинението против нив е покренато во Јужниот округ на Њујорк и дека станува збор за сериозни кривични дела насочени против Соединетите Американски Држави.
Според соопштението, Мадуро е обвинет за заговор за извршување наркотероризам, заговор за увоз на кокаин во САД, како и за поседување митралези и деструктивни направи, вклучително и заговор за нивно поседување. Бонди рече дека Мадуро ќе се соочи со американската правда пред американските судови, нагласувајќи ја решителноста на Министерството за правда.
Во своето обраќање, Бонди му се заблагодари на претседателот Доналд Трамп за, како што изјави, храброста да побара одговорност, како и на американската армија, која спроведе, според нејзините зборови, исклучително успешна операција за апсење. Таа особено ја нагласи улогата на војската во апсењето, нарекувајќи го Мадуро и неговата сопруга меѓународни трговци со дрога.
Мадуро беше обвинет во Јужниот округ на Њујорк уште во 2020 година, но неговото местоположба беше нејасно до неодамна. Според достапните информации, Трамп го одобрил неговото апсење пред неколку дена, операцијата ја спроведе елитната единица Делта Форс, додека ЦИА, со претходно претседателско одобрение, ја следеше неговата локација во Венецуела со месеци.
The post Трамп ја објави првата фотографија од уапсениот Мадуро: Во тренерка, со лисици и шише вода во рацете (фото) appeared first on Во Центар.
