Жителка на Виница, на возраст од 86 години, пријавила во полиција дека била измамена и дека на овој начин останала без 30.000 евра, информира Министерството за внатрешни работи.

Според пријавата поднесена во ОВР Виница, на 23 јануари 2026 година околу 08:50 часот, жената била телефонски контактирана од непознато лице кое се претставило како лекар од Словенија.

Тој ѝ соопштил дека нејзината ќерка, која наводно престојувала и работела во Словенија, се здобила со тешки телесни повреди и дека итно ѝ е потребна операција за која требало да се обезбеди поголема сума пари.

Доверувајќи се на информациите што ги добила, оштетената подигнала 30.000 евра од банка и, следејќи ги дадените инструкции, парите ги предала на лице кое дошло во дворот од нејзината семејна куќа за да ги преземе.

Подоцна, откако стапила во контакт со својата ќерка, жената сфатила дека станува збор за класична измама и случајот го пријавила во полиција.

Од МВР соопштуваат дека се преземаат соодветни мерки и активности за целосно расчистување на настанот и за идентификување на сторителот.