Украинскиот претседател Володимир Зеленски синоќа изјави дека борбените операции на фронтот не се прекинати и дека Русија подготвува нови напади.
Денес немаше прекин на огнот на фронтот, се водеа борби. Гледаме дека, за жал, Русија се подготвува за нови напади“, рече Зеленски во своето вечерно обраќање, пренесува „Суспилне“.
Тој изјави дека е одржан состанок на Врховниот команден штаб на Украина, каде што главна тема била руската употреба на воздушни бомби и зајакнувањето на воздушната одбрана на Украина.
Според него, Киев работи на развој на сопствени технолошки решенија за да може „реципрочно да одговори“ на Русија.
Зеленски додаде дека Украина продолжува со соработката со Соединетите Американски Држави во дипломатски и технолошки контекст, како и со бројни меѓународни партнери во областа на одбранбената индустрија.
Тој изјави дека околу 20 земји веќе учествуваат во проекти за развој на беспилотни летала со Украина, додека во тек се подготовки за нови договори, вклучувајќи ја и Канада.
„Веќе имаме политички договори со некои земји, а ќе има и договори со производители, нашата воена експертиза веќе дава резултати. Наскоро ќе потпишеме политички договори со некои земји. Почнавме со подготовка на таков договор – Договорот за беспилотни летала – и со Канада, ова е многу значајно проширување на безбедносната соработка“, рече Зеленски.
Украинскиот претседател, исто така, рече дека се водат разговори со европските земји и САД за производство на противракетни системи на територијата на Украина и дека една од стратешките цели е земјата да стане способна за сопствено производство на системи за воздушна одбрана.
Според него, Украина очекува и нови транши помош од европскиот пакет во вредност од 90 милијарди евра, додека во исто време се подготвува реформата на армијата, која треба да започне во јуни.
The post „Се подготвуваат нови напади“ appeared first on Во Центар.
