ВМРО-ДПМНЕ обвини дека претседателот на СДСМ, Венко Филипче, и партијата што ја предводи како главен политички приоритет ги имаат уставните измени и внесувањето на Бугарите во Уставот.

Според владејачката партија, СДСМ и Филипче ги игнорираат позитивните оценки од претседателот на Европскиот совет, Антонио Кошта, за спроведувањето на Реформската агенда, како и средствата обезбедени преку Планот за раст на Европската Унија, додека во фокусот постојано ги ставаат уставните измени.

„За Филипче и СДС не се важни домашните приоритети во државата, тие работат во прилог на бугарските позиции. За нив постои само една реформа, а тоа се уставните измени и распродавање на државните интереси“, наведуваат од ВМРО-ДПМНЕ.

Од партијата потсетуваат дека СДСМ, според нив, бил носител на најголемите политички отстапки во изминатите децении, посочувајќи ги промената на државното знаме, името и Уставот.

Во соопштението се наведува и дека Филипче ја продолжува политиката на поранешните лидери на СДСМ, Зоран Заев и Димитар Ковачевски, барајќи нови отстапки и прифаќање услови кои, според ВМРО-ДПМНЕ, не придонесуваат за достоинствен и рамноправен европски пат на државата.

ВМРО-ДПМНЕ повторува дека националните интереси, македонскиот идентитет, јазикот и историската посебност не смеат да бидат предмет на политички преговори и отстапки.

„Македонија заслужува европска иднина, но не по цена на нови понижувања и откажување од сопствените национални обележја“, се наведува во партиското соопштение.

Од ВМРО-ДПМНЕ оценуваат дека завршило времето кога, како што велат, СДСМ безусловно прифаќал надворешни диктати и додаваат дека државата ќе продолжи да ги брани своите државни и национални интереси.