Си-ен-ен објави истражување во кое тврди дека Израел за време на конфликтот со Иран тајно распоредил елитни воени и разузнавачки единици во Азербејџан како дел од поширока мрежа на позиции наменети за операции против Иран. Телевизијата се повикува на четири извори запознаени со активностите.

Според наводите, дел од единиците биле распоредени во јужен Азербејџан, во близина на иранската граница. Си-ен-ен тврди дека таму биле присутни припадници на израелските специјални сили, разузнавачки оперативци и други воени структури кои помогнале во следење и планирање на операции против Иран.

Но веднаш по објавувањето на текстот следеше остар демант од Баку, пренесува Анадолу.

Азербејџанското Министерство за надворешни работи соопшти дека наводите се „целосно неосновани“ и побара Си-ен-ен да ги повлече. Според официјалниот став на владата, азербејџанската територија никогаш не била користена за воени или разузнавачки операции против Иран.

Азербејџан има повеќе од 700 километри граница со Иран и со години одржува блиски безбедносни и воени односи со Израел. Токму поради таа географска позиција Техеран долго време изразува сомнежи дека израелските служби имаат значително присуство во земјата, иако таквите тврдења досега никогаш не биле официјално потврдени.

Во моментов нема независни докази што јавно ги потврдуваат тврдењата на Си-ен-ен, ниту пак медиумот објавил материјални докази за присуството на израелските сили. Од друга страна, азербејџанските власти инсистираат дека станува збор за дезинформација и политичка провокација.