Претседателката на крајно десничарската партија Алтернатива за Германија (AfD), Алис Вајдел, во летното интервју за германскиот јавен сервис ZDF изјави дека нејзината партија, доколку стане дел од федералната влада, ќе се залага за излез на Германија од еврозоната и Шенген зоната.
Во исто време, таа остро ја критикуваше Христијанско-демократската унија (CDU), тврдејќи дека оваа партија повеќе нема да може да победи на федералните избори поради одбивањето да соработува со AfD.
Вајдел го опиша еврото како „нестабилна“ и „мека“ валута, наведувајќи дека Германија била во подобра економска позиција пред воведувањето на заедничката европска валута. Според неа, AfD верува дека големи делови од работоспособното население се соочуваат со осиромашување, што го поврзува со актуелните економски политики и членството во еврозоната.
Зборувајќи за миграцијата, лидерката на AfD најави многу построга политика. Таа рече дека Германија ќе ги затвори своите граници и ќе се повлече од Шенгенскиот договор, оценувајќи дека отворените граници претставуваат закана за внатрешната безбедност. Таа, исто така, го критикуваше европскиот систем за азил, тврдејќи дека нелегалната миграција е надвор од контрола и дека Германија треба да го зголеми бројот на депортации и да го намали бројот на натурализации на странски државјани.
Вајдел го повтори барањето за укинување на забраната за мотори со внатрешно согорување и се спротивстави, како што изјави, на државните интервенции на пазарот. Кога станува збор за климатските промени, таа оцени дека тие отсекогаш постоеле и дека не се потребни дополнителни мерки за борба против климатските промени предизвикани од човековата активност.
Слични ставови изрази и друг лидер на AfD, Тино Чрупала, за време на интервју за ARD. Тој го опиша сегашниот топлотен бран како „сосема нормално лето“, обвинувајќи ја федералната влада за ширење страв меѓу граѓаните. Во исто време, Чрупала изрази сомнежи во врска со гласањето по пошта и повика на негово укинување.
Пред регионалните избори во Саксонија-Анхалт, Берлин и Мекленбург-Западна Померанија, врвот на AfD покажува голема доверба. Вајдел рече дека очекува партијата да победи на претстојните избори и дека AfD ќе ја преземе власта за прв пат во одредени германски федерални покраини, а во иднина и на федерално ниво.
Според последните анкети, AfD моментално убедливо води во Саксонија-Анхалт со поддршка над 40 проценти. На покраинско ниво, партијата исто така расте, а некои анкети на јавното мислење покажуваат дека е пред CDU, што дополнително ги зголемува политичките тензии пред есенските избори во Германија.
The post Депортации, укинување на еврото, излез од еврозоната и Шенген: Вајдел најави планови за Германија ако АфД дојде на власт appeared first on Во Центар.
