Два супертанкери што превезувале саудиска нафта биле погодени од непознати ракети само со неколку минути разлика додека го напуштале  Ормутскиот Теснец во понеделник вечерта, објавија компаниите за мониторинг и анализа на морскиот сообраќај „Марикс“ и „Кплер“, објави „Ројтерс“.

Инцидентите претставуваат нова ескалација на безбедносната состојба на една од најважните поморски рути во светот за транспорт на енергија, додека иранските и американските блокади веќе сериозно го ограничуваат извозот на нафта и гас од Заливот.

„Речиси истовремените инциденти претставуваат дополнителна ескалација на заканите во рамките на оманскиот коридор“, рече „Марикс“.

Првиот удар бил супертанкерот „Сидр“, кој плови под знамето на Саудиска Арабија. Според „Марикс“, непознатите ракети го погодиле бродот околу 16,6 наутички милји североисточно од Хасаб, Оман, околу 19:52 часот по Гринич.

Само неколку минути подоцна, „Сенегал Просперити“, супертанкер со либериско знаме, бил погоден околу 17 наутички милји источно од Хасаб.

Според „Марикс“, „Сенегал Просперити“ бил погоден од три непознати ракети. Сите членови на екипажот се безбедни.

Британската агенција „Обединето Кралство поморски трговски операции“ (UKMTO), исто така, објави дека три ракети го погодиле танкерот на истата локација кога излегувал од Ормускиот Теснец, што, според достапните информации, се однесува на истиот инцидент.

Нападите се случуваат во време на екстремно високи тензии околу Ормускиот Теснец. Иранските и американските блокади значително го намалија извозот на енергија од Заливот, бидејќи двете страни се обидуваат да воспостават контрола врз водниот пат.

Иранските медиуми денеска објавија дека саудиски танкер за нафта бил запрен додека минувал низ јужниот коридор на Ормускиот Теснец. Саудиска Арабија сè уште не го потврдила тој извештај.