Летонија цврсто се спротивставува на планираното укинување на санкциите на Европската Унија врз руските олигарси Алишер Усманов и Михаил Фридман, изјави синоќа министерката за надворешни работи Баиба Бразе.

– Ставот на летонската влада е непоколеблив. Санкциите на ЕУ против Русија мора да се зајакнат, а не да се ослабнат, објави Бразе на платформата Икс.

ЕУ е подготвена да ја укине забраната за патување и замрзнувањето на средствата на двајцата олигарси, поради страв дека не би можеле едногласно да го поддржат продолжувањето на санкциите против околу 3.000 други поединци, субјекти и компании.

Санкциите против двајцата про-Кремљ милијардери беа воведени неколку дена откако Русија ја нападна Украина во февруари 2022 година.

Санкциите на ЕУ врз поединци и бизниси поради војната на Русија во Украина периодично се обновуваат, а одлуките се носат едногласно.

Рокот за завршување на сите потребни законски процедури за обновување на санкциите истекува денеска на полноќ.

Како што објави Германската новинска агенција (ДПА), Франција и Словачка барале ублажување на санкциите врз Усманов, додека според Луксембург, ако се укинат санкциите врз Усманов, треба да се отстранат и казнените мерки и против Фридман.