Христијан Пендиков, секретарот на бугарскиот клуб „Цар Борис Трети“, кој беше нападнат во Охрид, се дефинира како етнички Бугарин, но не е бугарски државјанин. За разлика од него, еден од неговите напаѓачи е бугарски државјанин и Бугарија треба да се позанимава со него, изјави бугарскиот пратеник од редовите на „Продолжуваме со промените“ и премиер во екс-владата на Кирил Петков – Даниел Лорер, во гостувањето на бугарската ТВ „Нова“.

„Господинот кој беше нападнат во Македонија не е бугарски државјанин. Тој се дефинира себеси како личност со бугарска самосвест. Бугарија пред сè мора да ги заштити своите граѓани. Меѓутоа, еден од оние што го нападнаа е бугарски државјанин. Зошто да не зборуваме за него? Што правиме во врска со него?“, рече Лорер, пренесува „Фокус“.

Тој истакна и дека Софија не треба да алоцира толку ресурси за човек кој не е бугарски државјанин. Бугарија мора пред сè да ги заштити своите граѓани, смета тој.

Истовремено, неговата оценка е дека тензијата меѓу Бугарија и Македонија е вештачка, односно дека прашањето се политизира и дека, како што порача, треба да им се даде време на македонските институции да го разрешат случајот.

Неговите изјави наидоа на бурни реакции во бугарската јавност.